Kristine utoqqatserfigineqarnertik pillugu: Killitseqaanga

- Ulloq puiuikkiunnaqaaq. Ukiorpassuarni utaqqisatsinnik utoqqatserfigineqarnerput killitsissimaarutigeqalugulu qujaruteqaara.

75-inik ukiulik Kristine Heinesen taama oqarpoq. Taanna danskit ministeriunerata, Mette Frederiksenip, meeqqani misileraatigineqarsimasuni suli inuusut arfinillit allaffigalugit ullumikkut marlunngornermi akunnattuunngiivilluni utoqqatserfigisaata ilagaat. 

Utoqqatserneq Danmarkip naalagaaffiata kulturikkut 1951-imi misilittaanerani meeqqat kalaallit 22-t ilaqutaminnit avissaartitaallutik Danmarkiliartitaanerannut tunngasoq uani pineqarpoq.

AAMMA ATUARUK Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq

KNR-ip Kristine Heinesen utoqqatserfigineqarnerminni qanoq qisuariarsimanersoq aperaa.

- Allakkat atuarakkit tupaallaqalungalu nuannaajummeqaanga. Utoqqatserfigineqarnissarput sivisuumik sorsuutigaarput. Oqaluttuarisaanermik qulaajaaneq tamakkersimasoq atuarsinnaanngorpara, taanna oqarpoq.

Naalakkersuisut danskillu naalakkersuisui meeqqat misileraatigineqarsimasut oqaluttuarisaanerannik qulaajaaqatigiipput. 

Utoqqatserneq misilittaanerup kalaallit meerartaannut misileraatigineqarsimasunut kingunerisimasai ukiorpassuarni oqallisaareersullu pivoq. Taakkunanngami arlallit nalaassimasamik kingunerlutsitsipput, imigassamik ikiartoornartumillu atornerluisunngorput ilaallumi imminoriarsimallutik.

AAMMA ATUARUK Aaja Chemnitz Larsen: Ajuusaarpunga, killitsisimaalaartungaliuna

Ministeriunerup utoqqatsernera iluaqutigilluarumaarini, Kristine Heinstinep qularinngilluinnarpaa. 

- Utoqqatsernera nalaannikuusama alarnissaannut iluaqutigisinnaavara, Kristine Heinesen oqarpoq.

Mette Frederiksen ilimagisatut utoqqatserpoq. Taannami kalaallit meerartaannut misileraatigineqarsimasunut utoqqatsernissamik Bornholmimi siorna juunimi Qassimiuaartoqarnerani neriorsuuteqarpoq. 

Oqaluttuarisaanermilli aatsaat qulaajaasoqareerpat taamani utoqqatsissanerarpoq - oqaluttuarisaanermillu qulaajaaneq tamanut ullumi marlunngornermi saqqummiunneqarpoq. 

Naalakkersuisut danskillu naalakkersuisui oqaluttuarisaanermik qulaajaaqatigiipput, taannalu uani atuarneqarsinnaavoq.