Kristian Mainz Nuummi Eqqumiitsulianut katersugaasivimmi saqqummersitsivoq

Saqqummersitsinermi Nuummi Eqqumiitsulianik katersugaasivimmi apriilip 15-iata tungaanut takuneqarsinnaasumi takusassarpassuaqarpoq. Ujaqqanik basaltinik napasunik, ujaqqanik ivisaanik, anorimik imaanillu, tuapannik tarraninnerillu kusanarluinnartut assiliisartup Kristian Mainz assilisaminik saqqummersitsivoq.

-Kalaallit Nunaanni angalanera nuannerluinnarpoq. Assilisassarpassuaqarpoq, tamakkulu tamarmik piffissamik sivisoorsuarmik oqaluttuartuupput, soorlu ujaqqat allanngoriartornerannik. Ujaqqat ukiut millionillit matuma siorna pinngorsimasuupput ukiullu millionillit qaangiukkaluartut suli iniminnit nikissimaneq ajorput. Tamakku assut alutorisarpakka, Kristian Mainz knr.gl-imut oqaluttuarpoq.

Assiliisartup nassaassarsiullaqqissup assilisai Nuummi saqqummersitai assigiinngiiaartupilussuupput. Assit ilai piviusoorpalaartupilussuupput, allallu angalaffigineqarsinnaasutullusooq illutik, Kristiaallu paniata Kamilla Mainzip saqqummersitsinermut immikkut nipilersuusiorsimavoq.

-Paniga suleqatigalugu misigisaq nuannertuaannarpoq, aamma saqqummersitsinermik takuniaasunut immikkut misigisaqartitsinissaa qularutiginngilara. Misigisaqarfigilaavissorpara, assilisassarsiorlunga Kalaallit Nunaanniittarnera nuannareqaara. Qaarsut allanngorartut eqqumiitsullu sumi tamaani nassaassaapput, soorlulusooq assileqqusaaginnartut, Kristian Mainz oqarpoq.

Nuummi Eqqumiitsulianik katersugaasiviani apriilip qeqqata tungaanut saqqummersitsisussaavoq, katersugaasivimmukakulasuunngikkaannilu saqqummersitsineq una alakkartariaqarpoq. Kusartupilussuuvoq, tupaallannartortaqarluni, immikkuullarissuulluni aammalu assinut tiguartinnartumik nipilersuusersorneqarsimalluni.