Kristian Jeremiassenip Peqqinnissaqarfimmut saaffiginnittarneq naammagittaaliutigaa
Tamanna pissutigalugu Kristian Jeremiassen § 37 tunngavigalugu peqqinnissamut naalakkersuisumut pingasunik apeqquteqaateqarpoq. Apeqqutai uani atuarneqarsinnaapput:
- Qasigiannguani innuttaasut Aasiat peqqinnissaqarfianut nalunaaqutaq sisamap kingorna sianertarnerat atorunnaarsissinnarlungu Qasigiannguani peqqissaavimmut saaffinginnittoqartalernissaa pilersaarutaava?
- Maannamut misilittakkat suut pitsaaqutingisimavaat ajoqutingisimavaallu Aasiaat Peqqinnissaqarfianut sianeqqaarluta nakorsamik ikiorneqarsinnaaneq?
- Naalakkersuisut isumaqarpat Qasigiannguani innuttaasunut toqqissisimanartuusoq peqqinnissaqarfikkut sisamap kingorna innuttaasut taamatut sullinneqarnerat?
Apeqqutinut ilassutitut Kristian Jeremiassen allappoq Qasigiannguani innuttaasut piffissap suliffiusup nalinginnaasup kingorna sullinneqarnissamut periaaseq maanna atorneqartoq innuttaasut toqqissisimanartinngikkaat. Tamannami Aasianni nakorsamut oqarasuaatikkut sianernikkut pisarpoq, oqarasuaallu tamatumunnga atugassaq Qasigiannguani peqqinnissaqarfiup illutaata silataani inissinneqarsimalluni.
-Marlunnik assersuusioriarlanga: Assersuut siulleq Aasiaat napparsimmavianut sianeraanni misigineqartarsimavoq sianerfigiteqqinnginneq tamannalu toqqissisimannginnermik annertuumik pilersitsiviuvoq. Assersuutip aappaa innuttaasoq kilersimalluni nakorsamik pisariaqartitsimmat angajoqqaavinut nammineq isumageqqusimavaat, naak angajoqqaajusut nakorsamik pisariaqartitsigaluartut uteriittoqarneratigulli qujanartumik Qasigiannguit peqqissaaviani isumagineqarsimavoq mersorneqarlunilu, aaliuna nakorsamik takuneqarnissaa itigartinneqaraluartoq, Kristian Jeremiassen nassuiaavoq.
§ 37 tunngavigalugu apeqquteqaatit ullut suliffiusut qulit iluanni Naalakkersuisunit akissuteqarfigineqartarneri naliginnaasumik periaaserineqarpoq, taamaammat Kristian Jeremiassenip Qasigiannguanilu innuttaasut juullertinnagu Agathe Fontainimit akissuteqarfigineqarnissartik naatsorsuutigisinnaassavaat.