Kristian Jeremiassen Siumumit ilaasortaajunnaartoq
Qaasuitsup kujasissortaani kommunalbestyrelsissamut ilaasortanngortussap, Kristian Jeremiassenip Siumumi ilaasortaajunnaarnissani aalajangerpaa.
Jeremiassenip ilaatigut Qaasuitsup Kommuniata kommunalbestyrelsia Qasigiannguinut naammattumik iliuuseqarsorinngimmagu Siumumut ilaasortaajunnaartoq, Siumumut nalunaarummini, tusagassiuutinut ingerlateqqitamini allappoq.
Qasigiannguini isumaginninnermut suliat Qaasuitsup Kommuniata isumaginninnermut ataatsimiititaliaata siulittaasua allanngormalli pimoorunneqarunnaarsimasut, Kristian Jeremiassen isumaqarpoq.
AAMMA ATUARUK Naanguku suleqatikka?
Aamma Qasigiannguit inuerukkiartornerannut iliuuseqarniarnerminut Siumumit tapersersorneqarunnaarsimasutut misigisimalluni allappoq.
Borgmesterinngorniuttoqareernerani ilaasortaajunnaartoq
Qaasuitsup Kommuniata isumaginninnermut ataatsimiititaliaani soqutiginninngitsumik ataqatigiinngitsumillu aamma sulisoqarsoraa Siumullu tamatumunnga aaqqiiviginninnissamut iliuuseqannginnerarlugu.
Kristian Jeremiassen Qaasuitsup Kommuniata kommunalbestyrelsiani ilaasortaavoq, Qaasuitsullu kujasissortaani ikaarsaariarnermut ataatsimiititaliamut qinigaalluni.
AAMMA ATUARUK Ane Hansen borgmesterinngortussanngortoq
Kristian Jeremiassen kommunissami borgmesterinngorniuttoqaqqammertoq Siumumit ilaasortaajunnaarpoq, Siumumullu ilaasortanut tallimaasunut Enok Sandgreenip Nikolaj Jeremiassenillu Atassummeersumut Naja Petersenimut isumaqatigiissutaannut akuerinninngitsunut ilaavoq.
Taamaalillunilu Inuit Ataqatigiinneersoq, Ane Hansen, Qaasuitsup kujasissortaani borgmesterinngortussanngorluni.
Kristian Jeremiassen Siumut sinnerlugu Inatsisartunut siornatigut ilaasortaavoq, Aleqa Hammondillu pisortat aningaasaataannik atornerluineranut suliamut kukkunersiuinermut ataatsimiititaliami siulittaasutut suliarinnittut ilaanniilluni.
AAMMA ATUARUK Immikkut ilisimasalik: Jeremiassen marlunngorpat aalajangiisuussaaq
Kristian Jeremiassen Atassummut siornatigut ilaasortaavoq Siumumullu 2009-mi ilaasortanngorluni.