Kristian Jeremiassen: - Ikinngutigiikkaanni, partiimi sorlermi ilaasortaaneq apeqqutaanngilaq

Inatsisartunilu ataatsimiinnerminni pauseraangamik Partii Naleqqap allaffiani tammoorlutik pinnguartaput. Sapaatsip akunnerata tulliani Siumut Maniitsumi ataatsimeersuartitsilerpat Kristian Jeremiassen peqataassanngilaq.

Kristian Jeremiassen aperaarput ataatsimeersuarnermi peqataalinnginnera peqqutissaqavinnersoq. Siumumiillu tunualernersoq aperalugu.
 
- Naamik, qanorluunniit Siumumiit tunuarnaviangilluinnarpunga, Kristian Jeremiassen oqarpoq.
 
Siumut Maniitsumi ataatsimeersuarnerani peqataasussaannginnini nassuiaatissaqartilluarpaa. Nuliami ilinniarnerani qitornani paarisariaqaramigit. Inatsisartunilu qaammatit pingasut ataatsimeeqataareerami nuliami ilinniarnerani qitornani piffissaqarfigilluarnissanut piffissanngortoq.
 
Kristian Jeremiassen aamma aperaarput ikinngutigilluinnalersimasami partiianut nuunnialikkersaarnersoq.
 
- Ikinngutigiikkaanni, partiimi sorlermi ilaasortaaneq apeqqutaanngilaq, Inatsisartuni ilaasortaq Kristian Jeremiassen, siumumeersoq oqarpoq.  Ilanngullugu oqaatigaa siulittaasuni Aleqa Hammond ataqqilluinnarlugu.
 
Ilanngullugu aamma oqaatigaa ikinngutimi partiianut nuunnissaq ilimanaateqanngilluinnartoq, Siumut politikkikkut angerlarsimaffigimmagu.
 
Karl Kristian Kruse aamma Siumut Maniitsumi ataatsimeersualerpat peqataasinnaanani nalunaarpoq. Qeqartussaqarnera pissutigalugu.
 
Kristian Jeremiassen Inatsisartut upernaakkut ataatsimiinnerat naammassinngilaartoq oqaloqatigeerlugu inuulluaqquaatigut, ikinngunnilu Hans Enoksen ornillugu.
 
Inatsisartut ukiakkut ataatsimiinnerat aqagu naammassissaaq.