Kristian J.: Qaasuitsup Kommuniani akileraarut apparli

Kristian Jeremiassen-i isumaqarpoq Qaasuitsup Kommunia ilinniarsimasunut kajuminnarsarniarneqassappat akileraarutip procentimik ataatsimik appartinneqarsinnaanera aqqutissiuusseqataasinnaasoq.

- Tassa ilinniagaqarsimasunik maani pissarsissagutta aamma akileraarut procentimik ataatsimik appartariaqartoq isumaqarpunga. Taamaammat kommuuninut allanut unammillersinnaaneq siunertaralugu taamatut siunnersuuteqarpunga, Kristian Jeremiassen oqarpoq.

Qaasuitsup Kommuniani akileraarut 2011-mi procentimik ataatsimik qaffanneqarpoq. Taamaalilluni akileraarut 45 procentimut inissinneqarluni.

Kristian Jeremiassen-ip akileraarutip procentimik ataatsimik appartinneqarnissaanut siunnersuutaa aningaasanngorlugu Qaasuitsup Kommunianut ukiumut 16 million koruuninik naleqarpoq.

Qaasuitsup Kommuniani kommunalbestyrelsemi partiit suleqatigiit amerlanerussuteqartut aningaasaqarnermut tunngasunut oqaaseqartuata, Bendt B. Kristiansenip Inuit Ataqatigiinnersup takujuminaatsippaa akileraarut procentimik ataatsimik appartinneqassappat, aningaasat sumigaanniit aaneqarsinnaassanersut:

- Tamatta kommuunerput soqutiginarterusupparput. Kisianni maannakkut takujuminaatsittupilussuuara qanoq ililluta 16 millioniit missaat nassaarisinnaanerlutigit, Bendt B. Kristiansen oqarpoq.

Kristian Jeremiassen-i akileraarutip appartinneqarnissaanut siunnersuummini taasaqanngilaq aningaasat suminngaanniit aaneqarsinnaanersut.

Taamaattorli isumaqarpoq aningaasat kommuunip pigisaanit nalilinnit aaneqarsinnaasut:

- Aningaasat ilaatigut pissarsiarineqarsinnaapput kommuunip illuutaasa tunineqarnerisigut, aammalu allaffissornikkut iluarsartuusseqqinnikkut nassaarineqarsinnaasut isumaqarfigivara, Kristian Jeremiassen oqarpoq nangillunilu:

- Taamaammat oqartoqaannarsinnaanngilaq qanoq iliorsinnaanngitsugut. Sapiissuseqarnerusariaqartugut isumaqarpunga.

Bendt B. Kristiansen-ili isumaqarpoq sipaarfiusussamik siunnersuuteqassagaanni, aamma aaneqarneqarfissaat siunnersuutigineqartariaqartoq.

- Siunnersuuteqarniaraanni 16 million koruuninik sipaarutissanik, aamma siunnersuuteqarsinnaasariaqarpoq suminngaanniit aaneqassasut. Sapiissuseqarniaannarluta taamatut 16 million koruuninik sipaarniarsinnaanngilagut oqarnatalu suminngaanniit tiguniarlugit, Bendt B. Kristiansen oqarpoq.