Vittus Qujaukitsoq: Maqaasinera killeqassaaq
Suliassaqarfiillu taakku siullermik aningaasaqarnermut naalakkersuisoqarfimmi tullianilu inuussutissarsiornermut naalakkersuisoqarfimmi tunniunneqarput.
- Oqaariartuutigeriikkakka piviusunngortinniarpakka. Oqareerpunga Vittus utaqqiisaagallartumik aningaasaqarnermut naalakkersuisuussasoq, Naalakkeruisut siulittaasuat Kim Kielsen aningaasaqarnermut aatsitaasanullu naalakkersuisutut tunuartup, Vittus Qujaukitsup suliaanut qujaffigillugu ullumi oqalugiarmat taama oqarpoq, nagillunilu:
Uteqqippoq
- Tikilluaqqigit. Tuluttut oqaluttaravit, I'll be back (uteqqissaanga, aaqq.). Tamaanga uteqqissinnaagavit nuannaraara, Kim Kielsen oqalugiarnermini oqarpoq.
Tassa Vittus Qujaukitsoq maanna inuussutissarsiornermut, sulisoqarnermut, niuernermut nunanullu allanut naalakkersuisunngoqqippoq, Andreas Uldumillu sulinngiffeqannginnerani naalakkersuisoqarfigisimasaminut uteqqinnissani qilanaarisimallugu oqarpoq.
- Suliat ilai maqaasinassapput. Kisiannili ataatsimut isigalugu, isumaqarpunga maqaasinera killeqassasoq. Akisussaaffik nuannerpoq. Kisianni aamma pisussaafferujussuarmik malitseqarnera, taanna miserratissaanngilaq. Taamaattumik akisussaaffiit suliffigeriikkakka uterfigeqqinnissaannut aamma qilanaarpunga, Vittus Qujaukitsoq taama oqarpoq, Randi Vestergaard Evaldsenimullu kaammattuuteqarluni:
- Kinaassutsini attatissagaa, aammalu pingaartitaminik aalajangiussisimanissaa, taanna kaammattuutigerusuppara. Tassami kinaassutsini pigiinnaruniuk suliassaq suaagaluarpalluunniit oqinnerussaaq, Vittus Qujaukitsoq oqarpoq.
Randi pimoorussisoq
Randi Vestergaard Evaldsenip aningaasaqarnermut aatsitassanullu naalakkersuisunngorneranut Kim Kielsenip sulilluaqquaa.
- Pimoorussilluni suliassani qulaajartarlugit pisarsimavai. Naalakkersuisuni Inatsisartunilu ataatsimiikkaangatta tamanna malunnartarpoq. Taanna tamatta tulluusimaarutigisariaqarparput. Taamaammat massakkut aningaasaqarnermut naalakkersuisoqarfik, akisussaafferujussuaq, tigugakku imaannaanngeqaaq, Kim Kielsen oqalugiarnermini oqarpoq.
Randi Vestergaard Evaldsenilu aningaasaqarnermut naalakkersuisutut piareersimalluni oqarpoq, piffissami qaninnermi suliassami pingaarnerpaaq sunaanersoq oqaatigaa.
- Annertunerpaani massakkut suliassani mittarfeqarfinnut tunngavoq. Taanna aamma ingerlaannaq pulaffiginissaa sulissutigissavara, aningaasaqarnermut aatsitassanullu naalakkersuisoq, Randi Vestergaard Evaldsen oqarpoq.
Qaavani nillersinnaasarpoq
Nikittoqarnerani aamma tunissuteqartoqartarpoq. Randi Vestergaard Evaldsen paffequtinik sapangartalinnik tunineqarpoq – tassami qaavani nillersinnaasarmat.
Vittus Qujaukitsoq taartaasimanerminit qujassutitut naasunnappoq – matuersaatinilu naalakkersuisoqarfimmi pisortaanut quiasunnertalimmik tunniullugit.
Nikittoqarneranik malunnartitsineq aqquserngup illuatungaani Sulisoqarnermut Naalakkersuisoqarfimmi nanginneqarpoq. Tassani aamma oqalugiartoqarpoq, tamulugassaqarluni sodavandeqarlunilu nillataartunik, sulisullu naalakkersuisortik angerlaqqittoq, Vittus Qujaukitsoq tikilluaqquaat.
