Tasiilami sisamanngornermi sakkortuumik piterassamaartoq
Naqitsiniisaffiit Tunu sinerlugu Danmarkstrædekkut ingerlaaraangamik Piteralersinnaavoq.
- Piteraleraangat anori sakkortusinnaasarpoq, sekundimut 40 meterit 70 meterillu akornanni angullugit sakkortussuseqarsinnaalluni, tassa anorersuarujussuup sakkortussusaata marloriaataa, silap pissusianik DMI-mi immikkut ilisimasalik John Cappelen oqarpoq.
Anoraa aqagu ualikkut sakkortunerulertussatut aarlerisaarutigineqarpoq, anorersuartut, sakkortunerpaajugaanganilu anorersuarujussuartut sakkortutigisarsinnaassalluni. Tasiilami anoraa aqagu unnukkut sakkukilliartoqqilerumaarpoq.
- Ullumikkut januaarip ulluisa 22-at, Tasiilamilu Piterarnissaa sisamassaa aarlerisaarutigivarput. Ullup-qeqqata missaanni anorlernerpaanisssaa ilimagarput, akunnernilu tulliuttuni taamaakkallassangatinneqarluni. Taamaalinerani anorersuarujussuanngorsinnaanissaa ilimanarsinnaavoq, tassa sekundimut 32 meterit qaangertarlugit anoraasuartarsinnaassaqáq, sakkortunerpaanngoraangamilu sekundimut 43 meterit angusarsinnaassavai, DMI sinnerlugu Kalaallit Nunaannut silamik ilimasaarutinik nalunaarutiginnittartoq Anesten Devasakayam, ippassaq pingasunngornermi taama oqarpoq.
Tasiilami atuarfiup, meeqqeriviit, kommunillu allaffiata ullumi sisamanngornermi januaarip ulluisa 23-anni matoqqanissaat, Kommuneqarfik Sermersuup ippassaq nalunaarutigaa.
