Korea Avannarleq raketinik arfineq-aappassaannik igeriussisoq
Korea Avannarleq raketinik marlunnik illoqarfiit pingaarnersaannit Pyongyangimit sisamanngornermi ullaakkut igeriussivoq.
Korea Kujallermi illersornissaqarfik Korea Kujallermi nutaarsiassaqartitsivimmut Yonhapimut taama oqarpoq.
Raketit taakku marluk igeriunneqarnerisigut Korea Avannarleq ullut aqqaneq-marluk ingerlaneranni arfineq-marloriarluni maanna igeriussivoq.
Korea Avannarleq raketimik ungasissumut igeriunneqarsinnaasumik Japani qulaallugu marlunngormat igeriussivoq. Raketi taanna Manerassuarmi Japanimit 3000 kilometeritut ungasitsigisumut nakkarpoq.
AAMMA ATUARUK Korea Kujalliup USA-llu sakkutuui Koreap Avannarleq sillimaffiginiarlugu sungiusaqatigiilertut
Raketi taanna igeriunneqarmat Japanip avannaani nunap immikkoortuini marlunni innuttaasut qaartartunik eqqorneqatsaaliorluni qimaaffissalianukaqquneqarput.
Korea Kujalliup USA-llu Korea Avannarliup raketinik igeriussineranut akiniaallutik raketinik sisamanik Korea Kujalliup kangimut sineriaanit Japanip imartaata tungaanut igeriussipput.
Korea Avannarliup sisamanngornermi ullaakkut oqarnera naapertorlugu raketit ullumi igeriunneqartut Korea Kujalliup USA-llu sungiusarnerannut illuatungiliiniarneruvoq.
