Korea Kujalliup USA-llu sakkutuui Koreap Avannarleq sillimaffiginiarlugu sungiusaqatigiilertut

Korea Kujalliup USA-llu sakkutuui Korea Avannarleq pillugu najummassimanartorsiortoqaqqileruttornerani ullumi ataasinngornermi sungiusarnialerput.

Korea Kujallermi Seoulimi atorfilittat taama ilisimatitsipput.

Iligiit Korea Avannarliup sakkussianik misileraasinnaanissaa sillimaffiginiarlugu sungiusaqatigiinniarput.

Sungiusaqatigiittarnerit nalinginnaasunngortinneqarnissaat, Korea Avannarlermullu illersorniarnerup annertusarneqarnissaa, Korea Kujallermi præsidentitut maajimi ivertinneqartup Yoon Suk-yeolip neriorsuutiginikuuaa.

AAMMA ATUARUK Kim Jong-unip sunaluunniit nunanit allaneersoq akeqqersimaarfigigaa

Korea Avannarleq raketinik aatsaat taama amerlatigisunik ukioq manna misileraavoq, atomimillu qaartartorsuarmik arfineq-aappassaa qaartitsilluni qaqugukkulluunniit misileraasinnaanissaa aarleqqutigineqarluni. Korea Kujallermi atorfilittat taama ilisimatitsipput.

Korea Kujalliup USA-llu sakkutuui aasaq manna aqqanileriarlutik sungiusaqatigiinnissaat pilersaarutigineqartoq, Korea Kujallermi illersornissamut ministereqarfiup oqaatigaa.

Sakkutuut tuusintilikkaat ataatsimut ilaanni sungiusartinneqarnissaat pilersaarutaavoq.

Korea Avannarliup qaartartunik igeriuttakkanik Korea Kujalliup tungaanut igeriussisinnaanissaata aarlerinarsigaluttuinnarnera pissutigalugu Korea Kujalleq sillimaniarnerulerniartoq illersornissamut ministereqarfiup ilisimatitsissutigaa.