Korea avannarleq Japan qulaallugu rakettimik igeriussisoq

Korea avannarleq Japanip avannarpasinnerusortaata tungaanut rakettimik igeriussivoq.

Japanimi naalakkersuisut taama ilisimatitsipput. Korea avannarleq 2009-p kingorna siullerpaamik Japani qulaallugu rakettimik igeriussivoq, nutaarsiassaqartitsivik Reuters taama allaaserisaqarpoq.

Missili suli suussusersineqanngitsoq Sunanimit Pyongyangip ungasinngisaaniittumit nunatsinni nalunaaqutaq malillugu nal. 17.57 igeriunneqarpoq, Korea kujallermi illersornissamut qullersaqarfik taama ilisimatitsivoq.

Raketti kilometerinik 2700-nik ingerlaarpoq qutsissuserlu 550 kilometerit angusimallugu.

- Korea kujalliup USA-llu pisoq sukumiisumik paasiniaaffigileruttorpaat, illersornissamut qullersaqarfik nutaarsiassaqartitsivik AFP naapertorlugu taama ilisimatitsivoq.

- Rakettip Korea avannarlermit aallartinneqarnera, Japanilu qulaassimagaa uppernarsarsinnaavarput, amerikamiut illersornissamut ministereqarfianni Pentagonimi oqaaseqartartoq Robert Manning taama oqarpoq.

- Amerikap avannaani illersornissamut qullersaqarfik Norad naliliivoq raketti Korea avannarlermit igeriunneqartoq USA-mut sioorananngitsoq.

Raketti Cap Erimop kangiani Japanimit qeqertaata Hokkaidop avannarpasinnerusortaani kilometerinik 1180-inik ungasitsigisumi imaanut tuppoq.

Japanimiut premierministeriata Shinzo Abep oqaatigaa innuttaasut illersornissaannut sapinngisani tamaat iliuuseqarniarluni. Tamatumunngalu peqatigitillugu Naalagaaffiit Peqatigiit qinnuigai Korea avannarliup rakettinik misileraasarnerata unitsinnissaanut suli kimigiiseqqullugit, Reuters taama allaaserisaqarpoq.

- Sapinngisarput tamaat innuttaasut illersussavagut, Abe oqarpoq.

- Iliuuserineqartoq kusananngilluinnartoq - tassalu nunarput qulaallugu rakettimik igeriussineq - asseqanngilaq. Sioorasaarineruvoq ilungersunartoq pimoorussassarlu, aamma nunarsuup immikkoortuani eqqisseqatigiinnermut sillimaniarnermullu aserorsaataavoq, premierministeri taama oqarpoq.

Naalakkersuisut rakettimik igeriussisoqarneranik nalunaaruteqarnerup kinguninngua Japanip avannarpasinnerusuani innuttaasut kajumissaarpaat "qanoq iliornissamut piareersaateqaqqullugit.

Naalagaaffiup tv-qarfia NHK naapertorlugu raketti Japanip nunataa qulaallugu ingerlaarpoq.

Korea avannarleq rakettinik misileraalluni qaammatini kingullerni arlaleriarluni igeriussisarpoq.

Tamannalu kingullermik pivoq ullut marluk matuma siorna, rakettit pingasut Korea avannarlermit igeriunneqartut amerikamiut Manerassuarmi sakkutuuinit takuneqarlutik.

Amerikamiut naapertorlugit rakettit marluk ingerlaanngitsoorput ataaserlu igeriussinerup kinguninngua qaarsimalluni.

/ritzau/Reuters