Kopenhagen Fur puisit amiinik 10.000-inik Great Greenlandimit nassiussarseqqammerpoq
Puisit amii Great Greenlandimeersut 10.000-it novembarip aallaqqaataani tiguneqarput, ammeriviillu suleqatigiinnissamik isumaqatigiissuteqarnerisa kingorna amminik nassiussat siullersaralugit. Ammit 50-ikkuutaarlugit karsinut poortorneqarput Kopenhagen Furillu ukiut tallimariarluni amminik akitsorterussisarnerani tunineqassapput. Akitsorterussineq siulleq decembarip 14-iani pisussaavoq.
Kopenhagen Furip Great Greenlandillu taamatut suliaqarnissamut puisit amiinik immikkoortiterisartut misilittagartuut Lars Hendriksen aamma Finn Marqvardsen sulisussarsiarisimavai, taakkulu puisit amii aasarsiutissaqqissunut, ukiorsiutissaqqissunut, meqqoqarluartunut, pitsaassutsinut akuissutsinullu immikkoortiterpaat.
Peqatigisaanillu Kopenhagen Furip pisortaata EU-p puisit amiinik eqqusseqqusinnginnera Berlingske Tidendemi sakkortuumik isornartorsiorpaa eqqusseqqusiunnaarnerlu sianiitsuliornerunerarlugu, ilaatigullu aamma puisit amiinik eqqusseqqusiunnaarnerup Kinamut puisit amiinik tunisisinnaanermut akornutaaratarsinnaanera ernumassutigalugu.
Nunarsuarmi niueqatigiit kattuffissuata WTO-p qanittukkut aalajangiinerata kingunerisaanik EU-p puisit amiinik eqqusseqqusinnginnerminik atorunnaarsitsinissaa naatsorsuutigaara, pisortaq Torben Nielsen Berlingske Tidendemut oqarpoq.
- Suleqatigiilluta aaqqiissutissamik nassaarniarsaraagut, Great Greenlandip pisortaa Lars Berg, sisamanngorpat Københavnimi tusagassiortunik katersortitsinissamut aammalu akerliussutsimik takutitsinissamut qaaqqusisimasoq taama oqarpoq.
