Kommuunimi sulisut kattuffitsik AK isornartorsiorpaat
Qaqutigoorpoq sulisut sinniisaasa tusagassiutinut nalunaaruteqarluni kattuffimmik ilaasortaaffigisaminik isornartorsiuisarnerat, taamaattoq Panigpak Daorana isumaqarpoq AK eqeersarniaraanni allamik periarfissaqarani. Taanna Kommuneqarfik Sermersuumi sulisunit 100-nit taperserneqarpoq. Taakku AK-mi ilaasortat 15 procentiisa missaraat.
- 2009-mi kommuunit kattussuunnerisa kingorna paaserusuttarsimavarput suleriaaseq qanoq ittoq atussaneripput. Sulisut ataasiakkaarlutik sulisitsisunik ataatsimeeqateqarnissaat neriorsuutaasarsimavoq, taannalu aqqutigalugu suliap allassimasunngornissaa anguniarneqarluni. Maanna ukiut pingasut ingerlareernerani suli pisoqanngilaq AK-lu tamanna pillugu tusaaniarsimanngilaq, Kommuneqarfik Sermersuumi AK-mi ilaasortat sinniisuunerat Panigpak Daorana oqarpoq.
Tupaallaataanngitsumillu Panigpak Daoranap taama nalunaarnera AK-mit isumaqatigineqanngilaq. Erik Hammekenillu taakkartorneqartut ilisarisinnaannginnerarpai.
- Isumaga malillugu Daorana periarfissat tamaasa atorlugit naammagittaalliortarpoq tusaaqqusaarluni. Ilaasortagut tamaasa assigiimmik pisarpagut immikkullu pineqarnissaq ilimagineqarsinnaanngilaq kattuffiup allaffiata illoqarfeqatiginera piinnarlugu. Ilaasortat tamarmik ilisimatinneqartarput qaammatit pingasukkaarlugit ilisimatitsissutinik allagarsinikkut, Atorfillit Kattuffianni siulittaasoq Erik Hammeken oqarpoq.
AK-mi ilaasortat sinniisaat naammattumik ilinniartinneqarsimannginnamik sullissisinnaanerat amigartoq Panigpak Daorana isumaqarpoq. Tassamigooq AKp malittarisassai malillugit sinniisut ilinniartinneqartartussaapput. Malittarisassat malillugit sinniisut suliffitsik sapaatit akunnerit arfineq marluk angullugit qimassimasinnaaavaat ilinniarnertik pissutigalugu.
- AK saaffigiuartarsimagaluarparput pitsaanerusumik ilinniartitaajumalluta taamaasilluta ilaasortat ikiorluarnerusinnaagatsigit, tamatigulli AK-mi siulersuisunit akimmisinneqartarpugut. Ilaatigut siunnersuutigisimagaluarparput Danmarkimut pikkorissariartornissaq tassani takusinnaajumallugu suleriaaseq. Tamannali aamma siulersuisut ulluinnarnilu ingerlatsisut ilalernartissimanngilaat, tamannalu ilaasortatsinnut iluaqutaanngivippoq, Panigpak Daorana isornartorsiuivoq, neriunnerarporlu tamanut ammasumik isornartorsiuinikkut AK eqeersarsinnaallugu.
Taamaakkaluartoq Atorfillit Kattuffiata akissutigaa aningaasaqarniarnermik sukangasuumik aqutsineq pissutigalugu sinniisut pikkorissartarnerat killilersimaarneqartoq.
- Nunatsinni nunat immikkoortuini pikkorissaanerit ingerlanneqartarput aammalu nuna tamakkerlugu ataatsimeersuarnerni tamatigut ullut marluk atorlugit sinniisut pikkorissarneqartarput. Sinniisut allat isornartorsiuinerannik tusagaqarsimanngilagut, taamaammat Panigpak Daoranap isornartorsiuinera ilaleruminaatsippara. Kommuneqarfik Sermersuumi sulisut naapikulavagut naammagittaalliortunilli tusagaqassanata, Erik Hammeken oqarpoq, ilanngullugulu oqaatigaa isornartorsiuineq Daoranamut utertittariaqarlugu piviusorsiortuunngimmat.
