Kommuuni: Sulinngittoortarneq utoqqarnik sakkortuumik sumiginnaanermut pissutaavoq
Nangit amigaatigineqartut. Utoqqaat siniffimminni quisut aamma allat natermut quisoorneranni. Pisunilu tamani sulisut utoqqarnut ikiunissaminnut imaluunniit natermik asaanissaminnut piffissaqanngitsut.
Tassa tamakku Inatsisartut ombudsmandiata Narsami utoqqaat illuannut Luuvikasimmut aapriilimi alakkarterereersimanermi kingorna sapaatip akunnerani uani uparuagaasa ilai.
Kommune Kujalleq maanna akissuteqarpoq. Kommune Kujallermi inunnik isumaginninnermi ataatsimiititaliap siulittaasua, Mari S. Abelsen (S), nassuiaavoq utoqqaat paaqqutarineqarnerminni sumiginnarneqarnerannut sipaarniarnerit pissutaanngitsut. Sumiginnaasarnerli sulisut sulinngitsoortarnerannik patsiseqartoq.
- Soorunami akuerineqarsinnaangilaq tamanna, aaqqinniartuarnissaa uagut aamma kommunalbestyrelsimi sulissutigerusuttuaannarparput, Mari S. Abelsen oqarpoq.
Nangisinissamut akissaqartoqarpoq
Luuvikasimmi aqutsisut Inatsisartut ombudsmandiannut nassuiaatigisimavaat nanginik amigaateqartarneq Kommune Kujallermi sipaarniartoqarneranik pissuteqartoq. Tamannali Kommune Kujalleq naapertorlugu eqqortuunngilaq.
AAMMA ATUARUK Ombudsmandip utoqqaat illuat isornartorsioraa
2018-imi eqqiarnermut nanginullu aningaasartuutissatut missingersuutit 2,5 millionit koruuniusut iluanni taamaallat 80 procentit atorneqarsimapput. Ukioq mannalu aningaasaliissutaasunit, 1,9 millionit koruuniusunit, 1,4 millionit koruunit atorneqarnissaat naatsorsuutigineqarpoq.
Mari S. Abelsenili nassuiaavoq kommuunimi immikkoortortaqarfiit pisiniarniaraangata aningaasaqarnermut immikkoortortaqarfimmit akuerineqaqqaartarnerat ajornartorsiutaasimasoq. Tamannalu utoqqaat illuinut allanngortinniarneqalerpoq.
- Utoqqat illui tamakkiisumik akisussaalissapput. Tassani aamma nangernik pisiniartarnerup ajornartorsiutaasarnera taamaalilluni aamma qaangerneqarniassammat, Mari S. Abelsen oqarpoq.
Ilinniarsimanngitsut sulinngitsuukulasarput
Luuvikasimmi utoqqaat najugaqartut 21-usut sullissisuisa amerlassusaat naammattut Kommune Kujalleq aamma isumaqarpoq. Luuvikasimmi sulisut katillugit 39-iupput, taakkunannga 26-it utoqqarnik sullissisuullutik.
Sulisulli, ingammik nalunaaquttap akunnermusiallit, suliartunngitsooraangata tamanna utoqqarnut sullissinermi aporfiusartoq inunnik isumaginninnermi ataatsimiitsitaliap siulittaasuata nassuiaatigaa.
- Sulisut ilinniarsimanngitsut ajornartorsiutigiuaannartarpagut suliartunngitsoortoqartuartaramik, Mari S. Abelsen oqarpoq, nangillunilu:
- Qulakkeerusupparput siuinissami qaninnermi taamak pisoqaqqissanngitsoq. Aamma utoqqaat allatulli ataqqinartumik inooqataasussaapput.
Inatsisartut ombudsmandiata Luuvikasik pillugu nalunaarusiaa www.ombudsmand.gl-imi atuarneqarsinnaavoq.
