Kommunitoqqat akiitsui Qaasuitsup Kommunianut akiligassanngortinneqarput

- Kommunitoqqat akileraarutitigut akiitsorisaat kattussuunnerup kingorna, Qaasuitsup kommunianut akiligassanngortinneqarput, Borgmester Jess Svane akiitsoqalerneq pillugu nassuiaavoq.

Akiitsut matussuserniarlugit Qaasuitsup kommunia nunatta karsianit 53 millionit koruuninik taarsigassarsisinneqarpoq.

Akileraarutitigut akiitsut Qaasuitsup kommuniani innuttaasunut sunniuteqannginnissaat siunniunneqarpoq.

Qaasuitsup kommuniani akileraarut 2010-mi allannguuteqarani katillugit 44 procentiussasoq, borgmester Jess Svane oqarpoq.

- Qaasuitsup kommuniani innuttaasut annerusumik nammakkersorusunngilavut, Jess Svane oqarpoq.

Qaasuitsup kommuniata taarsigassarsiai 53 millionit koruuniusut ukiut pingasut ingerlanerini taarsersorneqassapput.

- Innuttaasunut sullissinitta innarlerneqarani ingerlaannarnissaa qulakkeerparput, Borgmester Jess Svane oqarpoq, nassuiaallunilu ingerlatsinermi nalilersuinerit ataavartumik ingerlanneqarnerisigut akiitsut taarsersorneqarumaartut, soorlu aamma sulisoqarnerup nalilersorneqarneratigut.

- Soraarsitsinissaq toqqaannartumik oqaatigineqanngilaq, pisariaqartitsiviusunut neqeroornissaq periarfissaalerpoq, Borgmester Jess Svane oqarpoq.