Kommunit isornartorsiutaat naliliisartumit taperserneqarput

Tassami marloqiusamik allaffissorunnaarnissaq, koruuninik milliuunilikkaanik sipaarnissaq aammalu aalajangigassat assigiinngitsorpassuit innuttaasunut qaninnerusumi aalajangerneqartarnissaat, kommuninik iluarsaaqqinnermi siunertaagaluarpoq.

Naalakkersuinermi pissutsinik ilinniagalik nunatsinni naalakkersuinikkut allanngoriartornerni, ukiuni 35-ni pisuni qanimut malinnaavoq. Taassuma paasilluarsinnaavaa, suliassaanik nussuinissamut, iluarsaaqqinnermut ilaatigut tunngaviusumut, kommunit erinitsammata:

- Kommunit naatsorsuutiginikuuaat, allannguinerup nassataata ilaatut suliassanik pingaarutilinnik taakkununngalu atatillugu aningaasanik atugassaminnik tigusaqassallutik.

Jakob Janussenip erseqqissarpaa, kommunit allaffissuini assigiinngitsuni sulisut eqqissiviilliortarnerat, naleqqussarniarnermi ajornartorsiuteqarnermut ersiutaasoq.

- Taama angitigisumik allannguisoqassappat, tamanna aamma annertuumik naleqqussarnernik malitseqassasoq naatsorsuutigineqasinnaasariaqarpoq.

- Aamma assersuutigiinnavillugu qanittukkut tusarparput, aatsitassarsiornermi suliartortut akileraarutaat Nunatta Karsianut taamaallaat tuttassasut, Naalakkersuisut pilersaarutigigaat. Taamatut iliornissap kommunit nunalu tamakkerlugu oqartussat akornanni isertitanik agguaasseqatigiinneq kalluarpaa. Isumaqarpungalu taamatut nalunaarneq isumaalliornerusoq.

Kommunit Namminersorlutillu Oqartussat akunnerminni aaqqiagiinngissuteqarnerat anigorniarlugu, piffissaqarluarlutik aporfitik oqaloqatigiissutigisariaqaraat, Jakob Janussen isumaqarpoq.

- Suliassat immikkuualuttut ataasiakkaarlugit piinnarnagit, suliassalli ataatsimut isiginiarsaralugit oqaloqatigittariaqarput, Jakob Janussen oqarpoq.