Kommunip sulisuusimasut politiinut sulianngortikkai

Kommuneqarfik Sermersuumi sulisuusimasut aningaasatigut pissutsini pasinartoqarnerani akuusimapput.

Kommunip sulisuusimasut politiinut maanna suliassanngortippai.

Kommune tusagassiuutinut nalunaarummi taama allappoq.

- Tamanna allaffeqarfimmi pissutsit pasinartut aamma kommunip aningaasaqarneranut annertuumik annaasaqaataasinnaasutut paasineqartut tunngavigalugit pivoq.

- Politiit paasiniaanerisa kommune suliami ilalerpassuk, taava kommunimi sulisuusimasut taarsiissuteqarnissaannik piumasaqaateqarluni suliassanngortitsisoqassaaq, Kommuneqarfik Sermersooq allappoq.

Kommunip oqarnera naapertorlugu tamanna kommunip aningaasaqarneranut sunniuteqarsinnaavoq.

Suliaq sumut tunngassuteqarnersoq aamma sulisut qanoq amerlatigisut pineqarnersut kommunip oqaatigerusunngilaa.

Kommuneqarfik Sermersuumi borgmesterip, Charlotte Ludvigsenip (IA) suliap misissorneqarnissaa qilanaaralugu tusagassiutinut nalunaarummi oqaatigaa.

– Inatsisinik unioqqutitsinerit akuerinngilakka. Innuttaasut aningaasaataat aquppagut, taamaattumik uagut pisortatut inatsisinik unioqqutitsinerit paasigaangatsigit pisussaaffeqarpugut qisuariarfigissallugit. Kommunip unnerluutiginninneranik politiit suliaqarnissaat qilanaarivara, tamanna inatsisinik peqqissaartumik misissuereernikkut pivoq.

– Allanik oqaaseqaatissaqanngilanga. Suliaq politiinut tunniunneqareerpoq, taakkulu misissuinerat utaqqissavarput, Charlotte Ludvigsen oqarpoq.