Kommunip avinneqarnissaanut atsiornernik katersisoq: Tamarmi pakatsinermik aallaaveqarpoq
Arnannguaq Hendriksen aamma Inunnguaq Reimer maajip ulluisa 14-ianni tallimanngornermi naammatsipput.
Avannaata Kommuniani kommunalbestyrelsit inissititeriffiusumik ataatsimiinnerisa kingunerisaanik Palle Jerimiassenip kommunimi borgmesterioqqinnissaata aalajangerneqarnerata kingornatigut taakku Uummannap Upernaviullu namminneq kommuneqalernissaat pillugu qarasaasiaq atorlugu atsiornernik katersilerput.
Atsiornernik katersinermik aallarniisoq, Arnannguaq Hendriksen Upernavimmi najugaqarpoq, taannali Uummarmiuuvoq.
Sooruna atsiortitsinernik katersilerpisi?
- Kingumut taamatut borgmestinngoqqinnerata pakatsiserujussuarpaatigut. Innuttaasut Ilulissat avataaniittut ineriartunngitsut, ineriartortinnissaat kusanartutut taagortaraluarlugit, kisiannili piviusunngortoqanngisaarnarnera pissutigalugu taamatut iliuuseqartariaqalersimavugut, Arnannguaq Hendriksen oqarpoq.
AAMMA ATUARUK Qaasuitsup Kommunia marlunngorlugu avikkumagaat
Innuttaasut ilaasa kommunip avinneqaqqinnissaa maanna kissaatigaat. Taakkumi Upernavik Uummannaq taakkulu nunaqarfii ilanngullugit Avannaata Kommunianit avissaartillugit immikkut kommuneqalernissaat kissaatigaat. Innuttaasut 1200-nit amerlanerusut tamatumunnga tapersiillutik qarasaasiat atorlugu maannamut atsioreersimapput, tamannalu Arnannguaq Hendriksenip ilorrisimaarutigilluinnarpaa.
- Soorunami tigulluarneqartutut taaneqarsinnaavoq, Avannaatalu Kommunia aggulunneqarnissaa qanorlu avissaarusutsiginerit tassani ersersiinnarpaa, Arnannguaq Hendriksen oqarpoq.
Kommunip avinneqarnissaanut atsiortitsinernik katersinermit allaanerusumik iliorsinnaagaluarpisi? Assersuutigalugu akerliussutsimik takutitsisoqarnissaanik aaqqissuussinermik?
- Soorunami taamatut aalajangersinnaagaluarutta, inuiaqatigiiulluta tusaaneqarluta taama iliosinnaagaluarpugut, kisiannili kommunalbestyrelsimut ilaasortat apeqqutaatillugit borgmesterinngortikkusutatsinnik toqqaapajuinnarsinnaannginnatta. Soorunami taanna angusinnaagaluarutsigu Sakio Fleischer toqqarsimassagaluarparput, Arnannguaq Hendriksen oqarpoq.
Kommunip allaffia pisoqarfiusoq
Kommunimut apriilip ulluisa arfernanni qinersisoqarnerata kingornatigulli Avannaata Kommunia pisoqangaatsiarfiuvoq.
Avannaata kommuniani kiap borgmesterinngornissaa pillugu pisoqarfiunera sivitsoriartuinnarpoq.
Siumut kommunalbestyrelsimut qinigaaffinnit 17-init arfineq-marlunnik qinigaatitaqarpoq. Partii qinersinerup kingorna qulingiluanik qinigaatitaqarfeqaraluarpoq - pisoqarfiulerporli.
- Nunatsinni kommunit 18-it kommunerujussuarnut sisamanut 2009-mi ataatsimoortinneqarput.
- Kommunerujussuit suliassanut annertuunut periarfissagissaarnerulernissaat, sulisut sulianut piginnaasaasa atorluarneqarnissaat sulisoqarniarnerullu ajornannginnerulersinneqarnissaa tamatumani siunertaavoq.
- 2010-mit 2017-imut kommunit sisamaapput; tassa Kommuneqarfik Sermersooq, Qeqqa Kommunia Kommune Kujalleq kiisalu Qaasuitsup Kommunia. Tamannali 2018-imi januaarip ulluisa aallaqqaataani allanngorpoq, tassa Qaasuitsup Kommunia kommuninut nutaanut marlunnut tassalu Avannaata Kommunianut Kommune Qeqertalimmullu avinneqarpoq.
- Avannaata Kommuniani kommunalbestyrelsit nutaat katiteriffiusumik maajip ulluisa 14-ianni tallimanngornermi ataatsimiipput, innuttaasullu marluk Avannaata Kommuniata avinneqarnissaa pillugu ullormi tassani qarasaasiaq atorlugu atsiortitsinernik katersilerput.
Siumut Nalerarlu kommunimi suleqatigiittussanngoraluarput, Sakio Fleischerilu Siumumeersoq borgmesterinngortussanngoraluarluni, borgmesterillu tullersortaa Naleqqameersuusussaagaluarpoq, taakku Uummannami siullermeertumik ataatsimiipput - Siumulli Naleraq maajip ulluisa aqqaneq-aappaani suleqatigerusukkunnaarpaa. Suleqatigiinneq aallartinngitsorluunniit unitsinneqarpoq.
Sakio Fleischerip oqarnera naapertorlugu Inuit Ataqatigiit, Atassut, Demokraatit Naleralu matoqqasumik isumaqatigiinnialersimapput. Taakku kommunalbestyrelsimi amerlanerussuteqalernissaminnut ataasiinnarmik amigaateqarpoq - taannalu ataaseq Palle Jerimiasseniusussaalluni. Palle Jerimiassen borgmesterip issiavianut maajip ulluisa 14-ianni ingimmat pisoqarfiunera inerniliiffigineqarallarpoq.
Palle Jerimiassen Siumumit qaammatip ataatsip matuma siorna tunuaramili attaviitsunngorpoq.
AAMMA ATUARUK Qaasuitsup Kommuniata avinneqarnissaata piviusunngornissaa qanilliartortoq
Attaviitsoq, Palle Jerimiassen borgmesteritut atuutileqqittup atsiornernik katersinerup kommunalbestyrelsimut ingerlateqqinneqarnissaa pingaartuusoraa.
- Eqqartussallugu soqutiginarpoq. Innuttaasut taamatut piumasaqarnerat pinngitsoornagu kommunalbestyrelsimut anngunneqartariaqassaaq, taava kommunalbestyrelsip qanoq iliuuseqarfiginiarnerlugu isummerfigissavaa, Palle Jerimiassen oqarpoq.
Avannaata Kommuniata avinneqarnissaanut suliniuteqartut tamatuma saniatigut illoqarfinni nunaqarfinnilu Ilulissat avataaniittuni sanaartortoqannginnera aamma isornartorsiorpaat.
- Uummannami, Qaanaami Upernavimmilu akunnittarfinnik sanaartortoqanngilaq. Siornatigut illoqarfiit uummaarissutut pisut, kommunerujussuanngornerup kingorna, siullermik Qaasuitsup Kommunianit massakkullu Avannaata Kommuninngortup illoqarfinni namminersortuaqqat ipisikkiartuaarlugillusooq ingerlasoqarsimanera akueriinnarneqarsinnaanngilaq. Taavalu massakkut maani oqartarnerattuut kaattarpalaannguarluunniit tusarsaajunnaarnikuuvoq, Arnannguaq Hendriksen oqarpoq.
Qinikkat tikeraartut
Kommunalbestyrelsimi ataatsimiititaliani siulittaasut illoqarfinnut taakkartorneqartunut tikeraarnissaat borgmesterip neriorsuutigaa.
- Qanittukkut illoqarfiit tikinniarpagut, Ataatsimiititaliani siulittaasut ataatsimiititaliat angalassapput.
- Uani isumaqatigiissutitsinni oqartussaaqataanerup, ineriartornerup piffinnilu nammineerluni akisussaassuseqarnerup annertusarnissaa pingaartorujuttut inissisimatipparput, Palle Jerimiassen oqarpoq.
AAMMA ATUARUK Innuttaasut kissaatigisaat Inatsisartut isumaqatigiissut ilalerpaat
Arnannguaq Hendriksenip politikerit nutaat tikeraarnissaat tigulluarpaa.
- Soorunami naapikkusussinnaavarput, ilaana.
Avannaata Kommuniani ataatsimiititaliat maajip ulluisa 31-anni inissititissapput.
