Kommuninik ilisimatooq: KANUKOKA-p agguataarnissaa unammilligassatuaanngilaq
Kisianni allaffissorneq kommuninut pingasunut agguataarlugu nuunneqassappat ajornartorsiutitaqartariaqanngitsoq, kommunini politikkikkut ingerlatsinermik ilisimatooq, Danmarkimi tusagassiornermik ilinniarfissuarmeersoq Roger Buch isumaqarpoq.
- Piffinni nutaani, interneteqarfiusumi, e-maileqarfiusumi, Skype atorlugu naapiffiusinnaasumi allatigullu periarfissaqarfiusumi, ajornartorsiutaasinnaasorpassuit, teknologi atorlugu imaaliallaannaq iluarsisinnaavagut, Roger Buch KNR-imut oqarpoq.
Siulersuisut isumaqatigiinngillat
KANOKUKA-p siulittaasuata Palle Jeremiassenip kattuffiup allaffiata aggulunnissaa mianersoqqussutigeqqammerpaa, KANUKOKA-p sannginneruleqqinnissaa aarleqqutigigamiuk, sulisut ullumikkutut piginnaasaqarlutik sullissisinnaajunnaassangatillugit.
Aamma atuaruk Palle Jeremiassen: KANUKOKA-p aggulunneqarnissaa isumatusaarnerunngilaq
Roger Buchilumi oqarsinnaanngilaq, sulineq siunissami pisariunerulernavianngitsoq.
- Pisariuneraanaversaartariaqarpugut. Suliat ilarpassui ataatsimeeqaterpassuaqarluni suliarineqarneq ajorput. Tamakkua assigiinngitsuni inissisimagaluarluni naammassineqarsinnaakutsoorput, Roger Buch oqarpoq.
Unammilligassai ilungersunarnerupput
KANUKOKA-p allaffiata nuunneqarpat, tamanna kommunit kattuffiata Namminersorlutit Oqartussani sunniutikinnerulerneranik kinguneqarsinnaasoq, Roger Buchip siornatigut oqaatigereerpaa. Maannalu aamma oqarpoq, kattuffiup siunissami unammilligassai ilungersunarnerusut.
Aamma atuaruk Kommunit pillugit ilisimatooq: Oqaloqatigiinnissaq ajornarnerulissaaq
- Allaffimmik agguluttuilluni kommuninut pingasunut inissiiniarneq sanngiillissutaanerpaassanngilaq. Sanngiillissutissaq anneq tassaavoq, kommunini sisamaasuni ataaseq ilaasortaajunnaarmat, minnerunngitsumillu ilaasortaajunanartoq kommunini annersaammat, kommunini politikkikkut ingerlatsinermik ilisimatooq, Roger Buch oqarpoq.
KANUKOKA-p allaffia agguluttorneqassanersoq, aallartitat sapaatit akunneranni tullermi pingasunngornermi isummerfigissavaat.