Kommunimut qinersineq tamakkiisumik isigalugu
Taaneqarnerit partiit tulliusut tassaapput Inuit Ataqatigiit, taakku qinersisartunit 29,4 procentinit taaneqaramik, 2008-mut sanilliullugu 2,5 procentimik siuarialaarlutik.
Partiit taakku marluusut siuariaataannut ilaavoq, ilaatigut Atassummut qinersisartunik tigusisimaneri. Atassut ukioq manna kinguariarpoq 2,5 procentimik, qinersisartunit 3.069-init qinerneqarluni.
Qinersinermi ajorsartutut oqaatigineqarsinnaasut tassaapput Demokraatit, taakku qinersisaat 2008-mut sanilliullugu affaannanngorsimallutik, nuna tamakkerlugu 1.521-nik qinerneqarlutik. Demokraatit 2008-mi 3.285-nik nuna tamakkerlugu qinerneqarput.
Kattusseqatigiit Partiiat Inatsisartunut qinersinermi isertitaqanngitsoortut aamma kommunalbestyrelsemut isertitaqanngitsoorput. Taakkuninnga taasisut 1,1 procentiinnaallutik, tassa qinersisartunit 268-init taaneqarlutik.
Partii Inuit kommunalbestyrelsenut qinersinermi aamma isertitaqanngitsoorput, taakkuninnga taasisut 1,3 procentiinnaallutik, tassa qinersisartunit 309-nit qinerneqarlutik.
Partiit ilaat siuariaateqaraluartut taamaattoq nuna tamakkerlugu ippassaq qinersineq peqataaffigineqangaanngilaq, tassa qinersisartut 58,2 procentiinnaat taasipput, 2008-mut sanilliullugu 3,7 procentimik appariarluni. 2008-mi qinersinermi qinersisartut 61,9 procentii taasisimapput.
Nuna tammakkerlugu qinerisisinnaasut ukioq manna 40.918-upput, taamaattorli taamaallaat 23.834-it qinersiartorsimallutik.
Kommunini pingasuusuni Siumukkormiunik borgemestereqarneq ingerlaannassaaq, tassalu Kommune Kujallermi, Qeqqata Kommuniani aamma Qaasuitsup Kommuniani.
Kommune Kujallermi nutaamik borgemsterinngortussaq tassaassaaq, Inatsisartuni ilaasortaasimasoq Naalakkersuisunullu ilaasortaasimasoq, Jørgen Wæver Johansen, Siumut. Taanna maannamut borgmesteriusumut, Simon Simonsenimut 15-inik amerlanerussuteqalaarluni ajugaasoq.
Aamma Qaasuitsup Kommuniani allamik borgmesterinngortoqassaaq, tassa Ilulissat kommuniugallarmat borgmesteriusimasoq, Ole Dorph Qaasuitsup Kommuniani borgmesterinngussaaq, maannamut borgmesteriusoq Jess Svane ajorsartimmagu.
Qeqqata Kommuniani maannamut borgmesteriusoq, Hermann Berthelsen qinersisartunit taaneqarluarnermi kingorna ingerlaannassaaq.
Kommuneqarfik Sermersuumi borgmesterinngorniuttoqarnissa kisimi ilimanarpoq, tassa maannamut borgmesteriutitaqartut, Inuit Ataqatigiit arfineq pingasunik isertitaqartut Siumukkut arfineq marlunnik isertitaqarput. Kommuneqarfik Sermersuumi amerlanerussuteqassagaanni qulinik ilaasortaatitaqartariaqarpoq. Tassalu Asii Chemnitz Narup-ip borgmesteriunini tigummiinnassaguniuk, Demokraatit marlunnik isertitaqartut, Atassut ataatsimik isertitaqartoq imaluunniit kisimiilluni attaviitsutut ilaasortanngortoq suleqatisigisariaqassavai.
