Kommunimit neriorsuineq upperivallaanngilaat
Decemberimi 2010-mi radioaviisimi asserluinnaanik saqqummiussisoqarpoq, tassa Oqaatsuni illut marluk Panbonik taaneqartartut aamma ukioq ataasiunngitsoq inoqarsimanngitsut sammineqarmata.
Niaqornaarsunni nunaqarfimmi aqutsisut 2009-miilli arlaleriarlutik Qaasuitsup kommunianut saaffiginnittarsimagaluarput,susoqarnerli ajorluni. Taamaattumik illut upernaaru iserterfigineqarsinnnaanerinik Qaasuitsup kommunianit nalunaartoqarnera, nunaqarfimmi aqutsisut upperivallaanngilaat
- Illunut isertoqarsinnaalernissaa arlaleriaqaluta allakkatigut allatigullu tusartuarsimavarput, Niaqornaarsunni nunaqarfimmi aqutsisuni siulittaasoq Agnethe J. Søholm oqarpoq.
Kommunimit neriorsuutigineqartoq piviusunngorumaartoq taassuma neriuutigaa.
Qaasuitsup kommuniani sanaartornermut avatangiisinullu immikkoortortaqarfimmi pisortaq Nick Nielsen oqarpoq:
- 2008-p naalerneranit 2009-mi februarip tungaanut illut atuarfittut atorneqarnerisa kingorna annertunngitsumik iluarsartariaqarput. Tassalu sanasut qanoq pilertortigisumik iluarsagassat aaqqissinnaaneraat apeqqutaavoq, kisianni oqaatigisinnaavara upernaaq naatinnagu iserterfigineqarnissaminnut illut piareersimassasut, Nick Nielsen oqarpoq.
Iluarsagassat annertunngitsut pineqarput, sorpiaanerili aamma qanoq akeqassanersut, aqagu sukumiinerusumik oqaatigineqarsinnaassaaq, Jan Erik Andersen Qaasuitsup kommuniani sanaartornermut pilersaarusiornermullu pisortaq oqarpoq.
Illut kommunit kattutinngikkallarmata Kangaatsiap kommuniata nalaani sanaajupput.
