Kommuni aarlerisaaruteqarpoq: Nuummi tallimanngornermi ullaakkut anorersuarlunilu nittaassaaq

Tallimanngornermi ullaakkut matukkut aniguit mianersornerussaatit. Anorersuarlunilu aqquserngit quasassapput.

Kommuneqarfik Sermersooq taama naatsumik nalunaaruteqarpoq.

Nunatsinnilu illoqarfiit pingaarnersaannut silassaq pitsaavallaarpasinngilaq. Naak sapaatip-akunnerata naanerani aasaanerani nalunaaquttamut ikaarsaartussanngoraluarluta, anoraasuasartumik natsimasinnarluni anorersualissangatinneqarpoq, 39-t millimeterinillu portutigisumik nittaassangatinneqarluni.

DMI naapertorlugu sekundimut meterimut 26-t angullugit anorersuassangatinneqarpoq, kiaganilu isseqanngikkuni arfineq pingasut tikillugit ississinnaassalluni. 

Tamannalu nivattaasut malinnaaniarnissaannut ajornakusuussagunartoq, Kommuneqarfik Sermersuumi attaveqaqatigiinnermut pisortaq, Lars Damkjær oqarpoq.

Nunatta sinnerani anorersuassanngitsoq

- Silamik ilimasaarut eqquutissaguni malinnaaniarnerput ajornakusuussaaq, attaveqaqatigiinnermut pisortaq oqarpoq.

Taassuma oqarnera naapertorlugu coronavirusertoqarnera pissutigalugu sulisunik angerlaannarsimasoqartariaqanngilaq. Taakku suliaffiat inuiaqatigiinnut pingaaruteqartuuvoq - taakkuli eqimattanut marlunnut avinneqassapput, taamaalillutik tamarmik ataatsikkut suliartussanatik.

Tamannalu pissutigalugu tallimanngornermi ullaakkut piffissaq sivisunerusoq atorlugu aqqusinerni aputaajaasoqassaaq. 

DMI-mit silassaq naapertorlugu Nuuk kisiartaalluni tallimanngornermi ullaakkut anorersuarluni nittaassaaq.

Upernaviup Aasiaallu akornanni natsimassaaq, kitaatalu sinnerani suffarissinnarluni natsimassaaq - nittaallertarsinnaassalluni. Sinerissalli qanittuani 21-t angullugit sukkassusilimmik natsimassangatinneqarpoq.   

Tasiilami unnuaru natsimalluni, anoraa kingorna sakkukilliguni suffarississaaq, aqaguli ullaakkut sakkukilliartulissalluni.