Kommuneqarfik Sermersuup Royal Greenland suleqatigaa
Kommuni suliffeqarfissuarlu suliffissaqartitsiniarnermut tunngatillugu annertuumik piginnaasaqarput ilisimasaqarlutillu, tamannalu sulisussarsiortarnermut, nuttarnermut, suliffeqarfimmi sulisussanik qulakkeerinninnissamut suliffimmillu sungiusarnermut tunngatillugu pitsaanerusumik angusaqarfiunissaat siunertaavoq.
Kommuneqarfik Sermersuumi borgmesteri Asii Chemnitz Narup (IA) sapaatit-akunnerani matumani Paamiuniippoq, tassaniinnerminilu Royal Greenlandip suliffissua pulaarpaa suliffissuullu suleqatiginera itinerusumik ilisimatitsissutigalugu.
- Royal Greenlandimik suleqatigiinnissamut isumaqatigiissutitta nutaap takutippaa Suliffissuup Kommunillu suleqatigiinneranni aqqutit nutaat atuallanneqalersut. Isumaqatigiissut naapertorlugu illuatungeriit tamatta pisussaaffilerpugut suleqatigiinniarluta, suliffissuup pikkorissunik sulisoqarnissaa qularnaarumallugu, aammali inuusuttunut tunngasut ilanngunneqarput, taamatullu sulisartut suleqqilernissaminnut ikiorneqarnissaminnik pisariaqartitsisut ikiornissaat ilanngunneqarput, forklarer Asii Chemnitz Narup.
Royal Greenlandimik suleqatigiinnissamut isumaqatigiissut Kommuneqarfik Sermersuup isumaqatigiissutigisimasaani taamaattuni siullersaavoq, kisianni Borgmesteri neriuppoq taamatut isumaqatigiissuteqarneq sullivinnut allanut siammartinneqarsinnaajumaartoq.
- Kommunitut iluarisimaaqaarput, Royal Greenlandip Paamiuni ingerlatani annertusarniarmagit sulisut amerlanerulersinnerisigut. Suliffissaaleqisut amerlalluinnarfianni sulliviit ataavartut qujanaqaat kiisalu aalajangersimasunut sulisunut iliuuseriniakkat nutaat pissutigalugit suliffiit pilerinartut pilissapput Paamiuni qangali pikkorissumik aalisarfittut ilisimaneqartumi, borgmesteri oqarpoq.
