Kommuneqarfik Sermersuup pisortaanertaani tikilluaqquaa
Steffen Ulrich-Lynge borgmester Asii Chemnitz Narupimit kiisalu Paamiuni, Tasiilami, Ittoqqotoormiini sulisut videokkoortumik tikilluaqquneqarpoq.
Asii tikilluaqqusinermini ilaatigut ima oqarpoq:
- Steffen Ulrich-Lynge pisortaaneralugu Kommuneqarfik Sermersuup pissanganartumik inerisarneqarnissaanut ineriartortinneqarneratalu nangeqqinnissaanut tamatta kommunimiittugut qilanaarpugut.
Steffen Ulrich-Lynge tikilluaqquneqarluarnerminik malunnartumik attortisimavoq, oqarlunilu:
- Sulilernissara qilaanaarisimaqaara, aamma nalunngilara atorfik unammiligassartarpassuaqartoq. Kommunimi anguniagassatut aalajangersarneqarsimasut ataatsimoorluta peqatigalusi anguniarnissaat qilanaarisorujussuuara. Kommunimi inoqarfiit ilisarinerulernissaat, tikillusilu ilassinissarsi qilanaaraara. Piffissami qaninnermi takorluukkat, oqariartuutit, ataatsimoorussamillu naleqartitat aammalu anguniakkat, iliuusissatut pilersarutinik ataqatigiissinniarlugit periusissatut pilersaarusiornissaq aallartissavara.
Illoqarfiit tamarmik immikkut qiimasumik Steffen Ulrich Lyngemut tikilluaqqussuteqarput. Sulisullu tamarmik erinarsuut nuannarineqarluartoq – Ullaaq – atorpaat.
