Kommuneqarfik Sermersuumi akileraarut aappaagu procentimik ataatsimik qaffanneqassaaq

Borgmester Asii Chemnitz Narupip oqaatigaa Naalakkersuisut 2014-imut aningaasanut inatsimmi sanaartugassanut aningaasaliissutit agguataarnissaat pillugit nalunaaruteqarnerisa kingunerisaanik kommunerujussuarmi inissianik sanaartornissaq ineriartortitsinissarlu attatiinnarniarneqassappat akileraarummik qaffaanissaq pisariaqartoq.

Kommuni Naalakkersuisunit isumaginiarneqanngilaq aammalu Kommuneqarfik Sermersuumut ataatsimoortumik tapiissutit 20 mio. koruuninik ilanngartuiffigeqqinniarlugit taakkulu aningaasat Kommune Kujallermut Qaasuitsup Kommunianullu agguaallugit.

- Akileraarutip procentianik qaffaanissaq nuanninngisaannarpoq. Kommunalbestyrelsitulli akissussaassusilittut kommunerput qulakkeerinniffigisariaqarparput, borgmesteri oqarpoq.

- Nuummut nuttarneq ingerlaavartuuvoq, inissaaleqinerujussuaq inissianillu nutarterineq anigorniarlugit ilungersortumik sulissuteqartuarpugut. Tunumi Paamiunilu innuttaasut aamma nutaanik sanaartortitsinikkut qulakkeerinniffigineqassapput. Eqqarsaatissat aapparaat inuussutissarsiortut. Nuuk tassaavoq Kalaallit Nunaanni aningaasaqarnikkut piorsaaffiulluartoq, inuussutissarsiuteqartullu akornanni qaffassaaneq aalajangiusimaneqassaaq, Asii Chemnitz Narup erseqqissaavoq.

Tamannalu tunngavigalugu 2014-imi januaarip aallaqqaataanit atuutilersumik kommunimut akileraarutip procentimik ataatsimik qaffannissaa pisariaqarpoq,  25%-init 26%-inut.

Peqatigitillugu kommunip Namminersorlutik Oqartussat 2009-mili taarsigassarsisitsinissamik nalunaarutaat atorluarniarpaa, inissialiortiternissamullu atugassanik 176 mio. koruuninik taarsigassarsisoqassalluni.

Tamatuma saniatigut kommunalbestyrelsip tamarmiusup aamma aalajangerpaa, kommunimi ingerlatsinermi aningaasartuutit qaffakkiartornerisa unitsinneqarnissaat. Allaffissornermilu pitsanngorsaanermik suliaqarneq ingerlatiinnarneqassasoq, Kommuneqarfik Sermersuumi borgmesteri Asii Chemnitz Narup ullumi taama nalunaaruteqarpoq.