Kommuneqarfik Sermersooq pitsaasumik aqussavarput
- Nunatsinni pisortat kiffartuussiviini isumaginninnermut aningaasartuutit qaffasinnerisa ersersippaat, isumaginninnikkut aningaasartuuteqarfiit tamaasa nutaamik nalilersoqqillugit sulisoqartariaqartoq. Inuit Ataqatigiinni suleqataanikkut anguniarusuppara inuussutissarsiorfiit suleqatigalugit suliffissaaleqisut ikilisinniarnissaat akisussaaqatigiiffissanngorlugu periusissiornissaq. Suliffissaaleqisut ikilissappata toqqaannarnerusumik kommuni inuussutissarsiorfiillu periusissioqatigiinnissaat pisariqarpoq. Pingaartumik nunatta avataaniit suliartortitat amerliartuinnarnerat killilersimaarneqassappat, Naja Lund, IA sinnerlugu kommunimut qinigassanngortittoq isumaqarpoq.
Aatsitassarsiorfiit avatangiisinut, pinngortitamut uumasunullu malunnaatilimmik innarliinngitsut akueraagut. Aatsitassarsiorneq akuersaarneqarsinnaasoq ineriartortinneqassaaq kommunimi suliffiit peqataatinnerisigut, suliffissaaleqisullu suliassaqarfinnut pisariaqartitanut naleqqussarnerisigut. Suliffissaaleqisuuneq piginnaasanik naleqqussaanikkut aqqutissanik nutaanik ammaassiffiussaaq. Isumaginninnerlu siunertanut ataasiakkaanut isumannaariffiussaaq.
- Taamaammat uteqqissavara Inuit Ataqatigiit pingaartikkatsigu kommuneqarfik Sermersooq inuussutissarsiortunik suleqateqarusuttuussammat. Aamma Inuit Ataqatigiit qulakkeerusupparput, aatsitassarsiorfiit pilersaarutinik ineriartortitsinerat ilutigalugu, suliffeqarfeqarfiit sulisitsisullu kommunitsinniittut peqatigalugit pitsaasumik angusaqarnissaq. Angujumavarput aatsitassarsiortoqassappat kommunitsinni suliffiutillit suliassanik tigusisinnaanerat periarfissatigut siuarsarneqassasoq. Ataatsimoorussamik inuussutissarsiorneq siuarsagaasoq Kommuneqarfik Sermersuumi aningaasarsiorfinnik nutaanik pilersitsiviusoq timitalersussavarput, Naja Lund knr.gl-imut oqarpoq.