Kommuneqarfik Sermersooq inuussutissarsiornermut siunnersuisooqatigiinnik pilersitsisoq
Inuussutissarsiuteqartut Kommuneqarfik Sermersuullu suleqatigiinnerat pitsaanerulersinneqarniarpoq. Taamaammat Kommuneqarfik Sermersooq Nuummi, Paamiuni Tasiilamilu inuussutissarsiornermut siunnersuisooqatigiinnik pilersitsivoq. Tasiilami siunnersuisooqatigiit Ittoqqortoormiinit sinniisunik ilaasortaqarpoq.
Kommunalbestyrelsimi ilaasortat, Kommuneqarfik Sermersuumi sulisut kiisalu najukkani inuussutissarsiuteqartut siunnersuisooqatigiinngortuni ilaasortaapput.
Kommuneqarfik Sermersooq tusagassiorfinnut nalunaarummi taama allappoq.
AAMMA ATUARUK Inuussutissarsiornermut ikiorsiissutit nutaat takornarialerisunut tapersiissasoq
Kommunalbestyrelsimi ilaasortanut siunnersuisussanik inuussutissarsiornermut pingaaruteqarsinnaasunik qulequttanik oqaloqatigiittarfimmik pilersitsinissaq siunertaavoq.
Inuussutissarsiornermut pilersaarutit, isummanik kiisalu inuussutissarsiornerup ineriartortinneqarnissaanut siuarsaataasinnaasunik suliniutinik aalajangersimasunik siunnersuutinik siunnersuisooqatigiit kommunimut tunniussisassapput.
- Illoqarfigut sisamat assigiinngitsorujussuupput, taamaattumik illoqarfinni inuussutissarsiuteqartunit illoqarfimminni unammillernarsinnaasunik ilisimasaqartunik siunnersortinnissarput aqqutissiuunneqarnissarpullu pingaaruteqarluinnarpoq, borgmesteri Charlotte Ludvigsen oqarpoq.
