Kommuneqarfik Sermersooq: Ilinniartitsisut ilinniaqqissinnaaleqqikkumaarput

Kommunilli ukioq manna aningaasanut missignersuutaasa malinneqarnissaat pillugu taamaaliortoqartoq oqaatigaa, imalu nangilluni:

- Ilinniartitsisut ilinniaqqikkusuttut pikkorissarusuttulluunniit, ilinniaqqereernermi pikkorissareernerulluunniit kingorna uteraangamik piginnaasaqarfigilersimasaasa sapinngisamik pitsaanerusumik atorluarneqarnerulernissaat pillugu pilersaarusiorniarpugut. Taamaammat massakkuugallartoq sipaarniuteqarniarpugut, pilersaarusiornissamut piffissaqarluarniassagatta,  Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaq Søren Valbak oqarpoq.

Ilinniartitsisut Kulunnguaq Jeremiassen aamma Inger Platou, perorsaanermik atugassamik tarnip pissusaanut tunngasumik ilinniakkamik, qallunaatut pædagogisk psykologiimik taaneqartartumik, ilinniaqqileruttorput, kommunilli atuarfeqarnermi sipaarniuteqarniarnera pissutaalluni ilinniaqqinnertik maangaannaq kipitiinnartariaqassavaat. Tamanna isornartorsiorpaat, asulersuaq ilinniaqqissimasutut misigisimallutik.

Sipaarniarnerit atuartunik aamma eqquissasut aarleqqutigaat, Søren Valbakilli Kommuneqarfik Sermersuumeersup erseqqissaatigaa ilinniartitsisut ilinniaqqissinnaanngikkallaannassasut, periarfissaaqqilerumaartorli.

Ilinniaqqissiinnaanermilli pikkorissarsinnaanermullu pilersaarusiortoqaqqaassaaq, aaqqissuussinerit taamaattut kommunimut sapinngisamik pitsaanerusumik tunniussaqarsinnaanissaat matumani anguniagaalluni.

- Aningaasat ilinniaqqinnernut atorneqartussatut naatsorsussat sapinngisamik atorluarneqassapput, ilinniartitsisut pikkorissarneqarnerisigut meeqqat atuarfianni atuartitsineq pitsaanerulerniassammat, Søren Valbak oqarpoq.

Ilinniaqqissinnaanissamut pikkorissarsinnaanissamullu periarfissaqartuassasoq, taassuma erseqqissaatigaa:

- Ilinniartitsisut peqatigalugit, taakkualu kattuffiat peqatigalugu, ilinniaqqissinnaanissamik pikkorissarsinnaanissamillu pilersaarutit aaqqissuunniarpavut, meeqqat atuarfiata siunissami aamma pitsaasuunissaa tamatta anguniaratsigu, Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaq, Søren Valbak, oqarpoq.