Kommunep karsia artorsinnagu Iserit Nuummi inissialiorniartoq
Inissialiat pillugit aalassassimaarutaasoq pissutigalugu Kommuneqarfik Sermersuup Nuummi inissialiulikkersaarnera unitsinngilaq.
Nunatsinni illoqarfiit annersaanni taamaalullutik aappaagu inissiat nutaat 100-t Iserit A/S-ip naammassiniarpai.
2021-mut aningaasartuutissat missingersorneranni isumqatigiissummut atatillugu politikerit Iserit inissianik nutaanik ukiumut 100-nik sanaartoqqullugu qinnuigaat. Taakkua 2026-p tungaanut kommunip inissianik 1850-inik sanaartuiniarneranut ikiuutaassapput.
- Inissiat siulliit 2022-mi naammassineqarnissaat naatsorsuutigaarput 2023-milu suli amerlanerit naammassineqarnissaat naatsorsuutigalutigu. Ingerlaavartumik sanaartornissamut pilersaarutit aallartittuassavagut, ukiumut inissiat 100-t naammassisinnaaniassagatsigit, Iserit pisortaa Torben Kortegaard oqarpoq.
Kommunep inissiaatileqatigiiffiata sanaartugassat nammineq aningaasaliiffigissamaarpai - tassa kommunemiit tapiiffigineqarani.
Kommunemiit tapiiffigineqarani
Novembarimi Namminersorlutik Oqartussat Nakkutilliisoqarfiat inerteqqutigisaanit tassa taanna allannguutaanerpaavoq. Torben Kortegaard nassuiaavoq.
- Kommunep tapiissuteqanngilluinnarnissaa tassani allannguutaanerpaavoq, taanna oqarpoq.
Tassanili aamma oisortat inissiaataannut akigititat nalinginnaasumit akisunerunissaat aallaaviuvoq.
- Inissiat attartornerannut akigititaq qaffassinnaagaanni kiisalu boligsikring aamma qaffallugu kiassarnermullu aningaasartuutit apparlugit, taava tamarmik aningaasatigut ataqatigiissinnaassapput, naak kommune minnerpaamilluunniit tapiissutqanngikkaluartoq, Torben Kortegaard oqarpoq.
Sermersuumi inissialioriaaseq inerteqqutaavoq
Kommuneqarfik Sermersuup namminersortunit sivisuumik attartornissaminut siumaqatigiissutai naapertorlugit Iserit aqqutigalugu inissiat nalinginnartut attartortissinnaaneri, Namminersorlutik Oqartussat Nakkutilliisoqarfiata unitsippaa.
Taakkua attartorteqqittarnerini akigititat sivisuumik isumaqatigiissutinut aniongaasartuutinut matussutaasinnaasanngillat.
Taamatut aaqqussuinikuuneq kommunemut maanna suli miliuunikkaanik akeqarsinnarpoq.
Assersuutigalugu taamatut aaqqissuussinermut kommune 2020-mi 11 milliuuninik akiliivoq, ukioq manna 17 milliuuni koruuninik kiisalu aappaagu 27 miliuuni koruunit akilerneqassallutik.
Taamatut aaqqissuussineq naapertorlugu kommune 2015-imili ingerlatsinikuuvoq, Nakkutilliisoqarfiulli tamanna kommuneni sinniisutut atsiorsinnaanermik unioqqutitsinerunerarpaa.
9.novembari Nakkutilliisoqarfiup tamanna aalajangerpaa.
Kommune sooq aningaasanik matussusiisussatut inissinnginnissaa aallaqqaataaniit aaqqinneqarsinammanngila?
- Oqartoqqarsinnaavoq inuppassuit Nuummut nutsertut inissaqartinniarnerannik kommune tatisimaneqarsimasoq, Torben Kortegaard oqarpoq.
Taassuma itisiliilluni oqaatigaa, taamatut aaqqissuussinikkut kommune sanaartuinani inissianik attartugassaqartitsinermigut akikinnerusumik aaqqissuussivigineqarpoq.
AAMMA ATUARUK Nakkutilliisoqarfiup aalajangernera borgmesterip tupaallaatigaa
Iserit A/S-ip maannakkorpiaq inissiat 48-t Pinguaqqami kiisalu 24-t Qeqernertunnguani sanaartorpai. Inissiat taakkua 72-it Nuummi sananeqartut Iserit nammineq sanaartortitarai, tassa pisortanit tapiiffigineqaratik.
Tassani inissiaatileqatigiiffik namminersortumik sanaartortitsilluni ukiuni sisamani ingerlasumik isumaqatigiissutrqarpoq. Isumaqatigiissut ukiuni arlalinni ingerlammat, sanaartuisoq akikinnerusumik neqerooruteqarsinnaavoq, sivisuumik isumaqatigiissuteqarnikkut sanaartugassanik pilersaaruteqariaannaasarami, Iserit pisortaa nassuiaavoq.
20 miliuuni koruuninik akiligassarsineq
Taamaattorli Iserit inissianik nutaanik pissaqartinniarlugu kommunep suli akiliisariaqartarnera assersuutissaqarpoq.
Nuummi Vandsøvejimi sanaartugaq ungasinngitsukkut aalassassimaarutaavoq immikkullu maluginiarneqarluni.
Tamatumunnga pissutaavoq siorna kommunep Iserit 20 miliuuni koruuninik atukkerniarlugu neriorsuisimanera Vandsøvejimi sanaartukkamut 2025-imi tamanna pisussaalluni.
Kommune taama iliorsimavoq, naak tamanna Aningaasaqarnermut Ataatsimiititaliami suliarineqartussaangaluarluni suli suliarineqarnikuunngitsoq.
Torben Kortegaard-illi oqaasii naapertorlugit, akiligassarsiassat taakkua Iserit sanaartugassaanut pineqartunut atanngillat. Tassa Iseri nammineq sanaartortitsisuummat.
Taanna nassuiaavoq, Iserit nammineq sanaartortitarinngisaani Vandsøvejimiittumi kommune blokkimik ataatsimik piserusunneranut atatillugu aningaasat taakkua akiligassarsiarineqarnissaat kommunep kissaatigaa.
Taamaammat 20 miliuuni koruunit taakkua tassaapput Iserit A/S-ip nammineq sanaartugaata kiisalu Vandsøvejimi sanaartukkap akiisa assigiinngissutaat, Torben Kortegaard nalunaarpoq.
