Kommunemi aningaasatigut ingerlatsineq sukangasooq

Suliffissaqartitsiniarnerulli inuussutissarsiornerullu ilorraap tungaanut ingerlalersimasup kommunip aningaasaqarneranut sunniuteqarluarumaarnissaa kommunalbestyrelsip ilutigalugu neriuutigaa. Nanortalimmi aalisakkanik tunisassiorfiup, aamma Narsami nersutinik toqoraaviup ukioq naallugu suliffinngornissaat kommunalbestyrelsip isumalluarfigaa, aamma Kujataani aatsitassanik piiaavissap aallartiinnissaa neriuutigalugu.

Ulluunerani paaqqinnittarfinnut akit kommunalbestyrelsip aamma neriuuteqarfigai. Angajoqqaat meeqqamut ataatsimut akiliutaat 2.500 koruunininik aappaagumut annerpaaffilerneqarpoq. Maannamut akiliutinut naleqqiullugu annikillingaatsiarluni.

Meeqqat Nanortalimmi Narsamilu atuartut Danmarkimut paarlaaqatigiillutik angalasarnerat, siorna sipaarfigineqartoq, 600.000 koruuninik aappaagumut aningaasaliiffigineqaqqinneqarpoq. Nunaqarfinnut kommunip kiffartuussinerata pitsanngorsarneqarnissaanut 1 millionit koruunit aamma immikkoortinneqarput. Innuttaasunullu kommunip kiffartuussinera taamaaginnassasoq aalajangiusimaneqarpoq.

Ukiuni tulliuttuni sanaartugassat Namminersorlutik Oqartussat aallartitaat Kommune Kujallermit naammagisimaarneqarput. Tassaapput Narsami Inuussutissalerinermut Ilinniarfiup, INUILI-p, allilerneqarnera, aamma nersutik toqoraaviliorneq, Qaqortumi utoqqaat illuliorneq, ilinniartut najugaqarfissaat marluk, aamma Narsami Alluitsup Paanilu atuarfiit iluarsaanneqarnerat.

Missingersuutit nutaat kommunalbestyrelsimut ilaasortat tamarmik akuersissutigaat, Kommune Kujallermi unimut akileraarutaasartoq 28 procentiusoq aamma taamaaginnassalluni.