Kommunefogedit aningaasarsiaqarnerulissapput
Kommunefogedit akissarsiaat juulip aallaqqaataanit aaqqiivigineqarunik, ajoqit ilinniarsimanngitsut akissarsiaat assigilissavaat. Tassa ukiumut 75.000 koruuninik akissarsiaqalissapput, taakku saniatigut timet suliffigisaat timemut akilersorneqalissallutik.
Qallunaat inatsisit atuutsinneqarnerannut ministeri, Morten Bødskov taama nalunaarpoq.
Kommunefogedit ukiumut 7.300-nit 50.000 koruunillu akornanni ullumikkut akissarsitsinneqartarput, tassalu qaffariaat malunnaateqangaatsiartussanngussalluni.
Nunaqarfinni sumiiffinni assigiinngitsuni kommunefogedit assigiinngitsunik akissarsitinneqartaraluarput, tassani apeqqutaalluni nunaqarfiit qanoq inuttutigineri. Akissarsiteriaaseq tamanna atuukkunnaassaaq. Nunaqarfinnilu annerni kommunefogedit amerlineqassapputtaaq.
Akissarsiat qaffanneri inuiaqatigiinnut 5 million koruuninik ukiumut aningaasartuutaanerulissapput, taakkulu aningaasat naatsorsorneqareersut iluini nassaarineqartariaqassallutik.
Kommunefogedit akissarsiaat ukiuni 29-ni kingullerni allanngortinneqarsimanngitsut kiisami aaqqiivigineqarput. Taamaalilluni kommunefogedinik atorfinitsitsinissaq pisariinnerulissasoq naatsorsuutigineqarluni.
Nunaqarfiit annerit ilaat kommunefogedeqanngillat, soorlu Upernaviup eqqaani nunaqarfik Nutaarmiut, ukiup matuma aallartilaarnerani ajorluinnartumik nalaataqartoq eqqarsaatigalugu.
