Kommunefogedit aningaasarsiaqarnerulersinnaassasut
Kommunefoged nunaqarfimmi 100-it inorlugit inulimmi ukiumut aningaasarsiai 7.373, 88 koruuniupput, qaammammut 614 koruuniullutik, 600-it sinnerlugit inulimmi ukiumut aningaasarsiai 50.285 koruuniullutik, qaammammut 4.190 koruunit.
Nunatsinni politiit naalagaaffiullu politiivi, Rigspoliti, januaari naalersoq kommunefodegit aningaasarsiaasa amerlineqarnissaannut tunngasumik ataatsimiissuteqarput. Ataatsimiittut isumaqatigiissutigaat kommunefogedit aningaasarsiaasa amerlineqarnissaasa periarfissaannik misissuisoqassasoq.
- Ataatsimiissutigineqartut tunngavigalugit kommunefogedit siunissami qanoq aningaasarsisalerumaarnissaat ukiup qiteqqunnerani paasinarsissaaq, Claus Claus Lyngholm Risbjerg politimestereqarfimmiit oqarpoq.
Kommunefogedit aningaasarsiaat ullutsinnut naleqqunnerulersitsikkusullugit nunatsinni politimestereqarfik ukiarmi 2011-mi innersuussivoq kommunefogedit ajoqitut ilinniarsimanngitsutut aningaasarsiaqarsinnaassasut. Ajoqi ilinniarsimanngitsoq ullumikkut ukiumut 75.113 koruuninik aningaasarsiaqartarpoq, qaammammut 6.259 koruunit.
- Maannakkut oqaatigisinnaanngilarput Kalaallit Nunaanni Politiit naalagaaffiup politivinik ataatsimeeqateqartarnerminni qanoq piumasaqartarnersut – innersuussuteqartarnersimanersulluunniit. Ilisimatitsissutigisinnaavarpulli Kalaallit Nunaanni Politiit isumaqarmata kommunefogedit aningaasarsiaat maannakkornit amerlanerusariaqartut, Claus Lyngholm Risbjerg KNR-imut erseqqissaavoq.
Kalaallit Nunaanni Politiit naatsorsuutigaat kommunefodeginut nutaamik aasaru ilinniartitsisoqassasoq.
- Taamaalilluta naatsorsuutigisinnaanngussavarput kommunefogedit suliaminnut maannakkornit tunniusimanerullutik sulisinnaalernissaat, Claus Lyngholm Risbjerg erseqqissaavoq.
Nunaqarfiit 13-it ullumikkut kommunefogedeqanngillat kommunefogedimulluunniit ikiorteqaratik. Kommunefogeditut atorfiit 58-upput kommunefodegimullu ikiortitut atorfiit 32-ullutik.
