Kommunefogedinut atugassarititaasut suli ajoqaat

Nanortallip eqqaani nunaqarfimmi Tasiusami kommunefoged, Karta Korniliussen qaammammut 533 koruuninik, akileraarut peereernagu akissarsiaqartinneqarpoq, naak illoqarfinni politiit suliassaasa assiginik suliaqartaraluarluni.

- Perulluliornerit assigiinngitsut sakkortuumillu pinerlussimasut suliarisarpavut, Karta Korniliussen oqarpoq.

Taanna ukiuni kingullerni tallimani Narnortallip eqqaanni nunaqarfimmi Tasiusami kommunefogeditut sulisarpoq ilinniartitsisutut atorfimmi saniatigut. Karta Korniliussen kommunfogedinngoramili suli pikkorissartinneqanngilaq. Tassalu tamannarpaavoq Karta Korniliussenip kissaataa.

- Inuttut atugassarititaasut eqqarsaatitagalugit, pinngitsoornata pikkorissartinneqartartussaagaluarput, tassalu tamannarpiaavoq amigaatitut isigisara. Karta Korniliussen oqarpoq.

Taanna aamma isumaqarpoq, akissarsiat pitsanngortinneqartuuppata, atugassarititaasut pitsanngortinneqaersinnaagaluartut.

Karta Korniliussenip ukiumut aningaasat tigusartagai 6400 koruuniupput, suli akileraarut peernagu. Aningaasat tigusartakkat saniatigut suliartoqqusaaanermi timemut akissaat tassaavoq 82 koruunit 71 ørillu. Immikkut suliartoqqusaanermi nalunaaquttap akunneri sisamaannaat akissarsissutigineqartarput, tassa qanorluunniit sivisutigisumik sulineq apeqqutaatinnagu.

- Taama akiluttortigisoqarnerata kommunefogeditut sulerusuttut killilersimaarpaat, taamaattumik akissarsiat qaffanneqartariaqaraluarput, Karta Koprniliussen oqarpoq.

Kommunefogeditut atorfinitsitsisarneq ukiorpassuarni ajornartorsiutaasarsimavoq. Tassalu tamannarpiaq pillugu, Eqqartuussiveqarneq pillugu ataatsimiititaliarsuup isumaliuussutimini 2004-mili allaaserisaa.
Karta Korniliusseni kommunefogeditut atorfimmi saniatigut Tasiusami ilinniartitsisuuvoq, kommunefogeditullu sulisinneqartarnera akulikilluni.

- Sapaatip akunneri tamangajaasa suliartortitaasarpunga, Karta Korniliussen oqarpoq.