Kommune Qeqertalimmi partiit tamarmik isumaqatigiittut: 2021-mut 10 millionit koruunit amigartoorutaasut

Kommune Qeqertalik ukioq manna 2021-mi isertitakinnerunissaminik naatsorsuuteqarpoq. Tamanna ingerlatseqatigiiffinnut akileraarutit 30 procentimit 25 procentimut ukioq manna apparneqarnerannik pissuteqarpoq.

Inuussutissarsiortulli coronap ilungersuatitsineranit aningaasaqarnikkut sunnerneqarnissaq naatsorsuutigigaat, kommunimi politikerit erseqqissaatigaat.

Taamaammat kommunalbestyrelsip 2021-mi 10 millionit koruuninik amigartooruteqarnissaq naatsorsuutigaa.

Amigartooruteqarnerli kommunip assigiinngitsunik sanaartornerata ingerlateqqinnissaanut akornusiinavianngilaq.

Kommunimmi karsiani amigartooruteqarnissamut iliuuserineqarsinnaasoqartoq, Inuit Ataqatigiit, Siumut Atassullu isumaqarput.

- 2021-mi 10 mio. koruuninik amigartoorutilimmik missingersuusiorsinnaanera illersorneqarsinnaavoq, pissutigalugu ukiut kingulliit pingasut naatsorsuutinik sinneqartoorluarnerup kingunerisaanik aningaasat atoriaannaat isumannaatsumik amerlassuseqalernissaat anguneqarsimammat, tusagassiuutinut nalunaarummi allassimavoq.

Taamaammat tamanna sanaartornernut aallartinneqareersunut sunniuteqarnavianngitsoq, partiit pingasut neriorsuipput.

- Kommunalbestyrelsip pingaartippaa sanaartugassat annertuut isumaqatigiissutigineqareersullu ingerlaannassasut, isumaqatigiinnermi partiit allapput.

Tassa kommunip atuarfinnik, meeqqerivinnik, utoqqarmiunik, utoqqarnut inissianik, innarluutillit najugaqatigiiffissaannik, inissianik attartortakkanik sanaartorneq ingerlaannassaaq aammattaaq kommunip inissiat pioreersut iluarsartuutiinnassavai.

Kommunip nunaqarfinni illoqarfinnilu tamani eqqakkanut kuuffissanik pilersitsinissamik pilersaaruteqarneq ukiuni tulliuttuni 40-ni aamma ingerlatiinnassavaa.

- Suliniutit pitsanngorsagassallu ingerlateqqissavagut ingerlassimasagut, ineriartorteqqitassallu pitsaasumik tullissatsinnut tunniunneqarnissaat tamatta kissaatigisorujussuuarput.

Kommune Qeqertalimmi kommunalbestyrelsip kommunip 2021-mi isertitassai 601 millionit koruuniunissaat missingersorpaa.

Isertitalli aningaasartuutinit annikinnerussapput, tassa taakku katillugit 611 millionit koruuniussapput taakkunanngalu 75 millionit koruunit sanaartornermut atorneqassallutik.