Kommune nassuiaaqusivoq

- Ataatsimut isigalugu ilisimatinneqarsimanngilagut politikkikkut suliaqartut Qaasuitsup Kommuniani qitiusoqarfimminngaanniit matusisoqartoq. Naak, avammut nalunaarummi allassimagaluartoq piniarnermut pisortaqarfik Qaasuitsullu Kommuunia suleqatigiillutik qilalukkanik qernertanik matusigallartut. Tassa kisianni uagut politikkikkut maani issiasuusugut Qaasuitsup Kommuniani ilisimasimanngilarput taamatut matusisoqarnera.

Jens Kristian Therkelsen Qaasuitsup Kommuniani aalisarnermut piniarnermullu ataatsimiisitaliami siulittaasoq taama oqarpoq.
Aalisarnermut piniarnermullu Naalakkersuisoqarfiup Qeqertarsuup Tunuani Uummannamilu qilaluarniarneq januaarip 31-ani matugallarpaa. Naalakkersuisoqarfimmiit taamani tunngavilersuutigineqarpoq qilalukkat qernertat pisarinerinut atatillugu nalunaarsorneqartarneri amigarpallaartaqimmata matuneqartut.

Kisianni piniartut Aasianni, Qeqertarsuarmi Uummannamilu tunngavilersuutit taakkua ippassaq ilisarisinnaanagit oqarput, piniartullu pisatik nalunaarutigisaraat aamma oqarlutik.

Qaasuitsup Kommuniani Aalisarnermut ataatsimiisitaliaq ullaap tungaa ataatsimiippoq. Matusigallarnermullu periutsit ippigalugit toqqammaviusunik maanna paasinnerusulerput:

- Suleriusip taassuma ippinnartoqarnera uparuarparput. Paaserusupparput suna patsisaanersoq aammalu inatsit suna tunngavigalugu matusineq pinersoq paaserusullutigu. Tassa takujuminaatsikkatsigu taamatut politikki avaqqullugu imaluunniit arlaatigut matusigallarsinnaaneq qanorpiaq sunalu inatsit tunngavigalugu ingerlanneqarsimanersoq.

Aalisarnermut Piniarnermullu Naalakkersuisoq, Finn Karlsen, avannaani piffissami matumani angalasoq oqaaseqartitsinniaraluaratsigu iluatsinngilarput.