Kommune Kujalliup kommunalbestyrelsianit tunuartoq
Inuit Ataqatigiit sinnerlugit kommunalbestyrelsimi ilaasortaajunnaartup atuakkiortarnini ukkatarinerorusullugu tunuarpoq.
- Ukiuni kingullerni qinikkatut sulinermut nukinnik atuisimanerujussuara pissutigalugu eqqumiitsuliortutut, tassa allattartutut, suliakka assut tunulliussimavakka, inuusuttut atuagassaaleqissunneqarnerisa nalaanni inuttut ajuusaarutigisaqisannik, Kelly Berthelsen tusagasiuutinut nalunaarummi taama allappoq.
Tamatuma saniatigut arlalinnik suliaqarnini ajornakusoortillugu allappoq.
- Qinikkatut suliinnassaguma sulisutut qinikkatullu suliassakka tamakkiisumik isumagisinnaajunnaassavakka. Tamakkiisumillu arlaannaalluunniiit tunniussimaffigisinnaanngikkukku kikkunnulluunniit iluaqutaanavianngilaq, Kelly Berthelsen allapoq.
Inuiaqatigiilli pillugit oqallinnermi peqataasarumaarluni erseqqissaassutigaa.