Kommune Kujallermiut pisassinneqanngillat

Ivittuuni umimmaat Kommuneqarfik Sermersuup namminerluinnaq aquppai, aggustimilu piniarnissami pisassat 300-t nammineq innuttaasuminut agguaallugit. Sanilia Kommune Kujalleq pisassinneqanngilaq tamannalu borgmester Simon Simonsenip naapertuutinngitsutut isigaa.

Ivittuuni umimmattassat Kommuneqarfik Sermersuup marloriarlugit agguaattarpai, siullermik aggustimi pisassat. Tullissaanillu novembarimi decembarimilu pisassat.
Kommune Kujalleq siorna 30-nik tunineqarpoq, maannali piniarnissami siullermi pisassinneqanngilaq.

Tamanna qinikkanit eqqarsaatigineqaqqittariaqartoq Simon Simonsenip oqaatigaa:

- Paasisinnaanngilarput sooq Kommunit sanilerisatta, aammalu qanittunnguusoq maanga Kommunemut aasaanerani pisassissimanngikkaatigut. Qinnuteqaatit piffissaq eqqorlugu ingerlanneqarnikuupput, akineqarnerlu ajoratta ippassaaniinnannguakkut tusarniaatitsigatta paasivarput aasaanerani pisassinneqarsimanngitsugut, Simon Simonsen taama oqarpoq. Nangillunilu oqaatigaa aasarisseruttornerani kujataani piniartut aningaasanik isertitsissutaasinnaasunik pisassinneqarnissartik kissaatigigaluaqigaat.

Kommuneqarfik Sermersuumi borgmesteriugallartoq Doris Jakobsenip paasisinnaanerarpaa, umimmaat 45-it Kommune Kujallermut qaammatini novembarimiit decembarimut pisassiissutigineqarnerat Kommunimi kujaliminnit illersorneqarsinnaanngitsutut isigineqarmat. Kujataaniit Ivittuunut taamaalinerani angalaniarneq ulorianarmat.

Taamaammat suliaq Inuussutissarsiutinut Ataatsimiititaliamut suliassanngorteqqippaa, qanorli inerneqarumaarnera maannangaaq oqaatigisinnaanngilaa:

- Isumaqarpunga suliaq ilungersunartuusoq, aamma paasillugu piffissami piniarneqartussatut aalajangiisimaneq pitsaasuunngitsoq. Taamaattumik suliaq Inuussutissarsiutinut Ataatsimiititaliamut ingerlateqqippara, isumaqarama pisassiissutinut tunngasortai suliareqqittariaqarai, Doris Jakobsen  oqarpoq.