Kommune Kujallermi partiit tamarmik suleqatigiissapput
-Isumaqatigiissut ajornanngippat una sapaatip akunnera partiini tusarniaassutigineqarnera naammassissaaq, Jørgen Wæver Johansen, Kommune Kujallermi borgmesterinngortussaq oqarpoq aamma oqaatigaa ataatsimiititaliat inuttalersorneqarneri naammassineqareersoq, taakkuali suli saqqummiukkusunnagit.
Isumaqatigiinniarnermi pingaartinneqarsimavoq ataatsimoorussamik isumaqatigiissuteqarnissaq.
-Sumiiffinni partiit qineqqusaarutaat assigiipput, soorunami assigiinngissutit oqaloqatigiissutigisarpagut naaperiartarlutalu, Jørgen Wæver Johansen isumaqatigiinniarnerit pillugit oqarpoq.
Kommunalbestyrelsep nutaap qiningaaffia pisortatigoortumik maajip aallaqqaataani aallartissaaq, Kommune Kujallermilu Kommunalbestyrelsep ataatsimeeqqaarnissaannut atatillugu Kaj Lyberth ammaasuussaaq, tassa sivisunerpaamik Kommunalbestyrelsemut ilaasortaasimangami.