Kommune: Annat issumut akulerussinnaaneri ilisimaneqanngilaq
Imaanngilarli ph.d.-nngorniutigineqartoq malillugu peqqissutsimut ulorianarsinnaasorineqarneri pillugit taamatut ammaffigigaat, tassami annat issumut akulerunneqartut ilumut issittumi atorsinnaanersut iluamik ilisimasaqarfigineqanngimmat.
- Anartarfiimmi imaartakkat puussiartaat sumiiffinni amerlanersaani alinneqarlutik imaarneqartarput, puussiartaallu ikuallanneqartarlutik, taamaammat avatangiisinut mingutsitsisinnaasutut taaneqarsinnaanngillat. Lone Kristensen, Qeqqata Kommuniani avatangiisit pillugit sullissisuusoq, taama oqaluttuarpoq.
Annanik saliisarneq pillugu ph.d.-nngorniarnermut atatillugu anartarfiit imaartakkat peqqissutsimut avatangiisinullu ajoqutaasinnaaneri mianersoqqussutigineqareermata, anartarfiit imaartakkat iluamik passunneqarsimanngippata ilumut ulorianaateqarsinnaaneri Nakorsaaneq Flemming Stenz Radioaviisimut erseqqissaateqarpoq.
Naalli Qeqqata Kommuniani anartarfiit imaartakkat ajornartorsiutigineqanngikkaluartut innuttaasut ulikkaartoorsimariarlutik puussianik silatiminnut ilisiinnartarneri ulorianaateqarsinnaalluarput.
- Sumiiffiit amerlanersaani anartarfiit imaartakkat sulisunik qanoq passussinissamut ilisimasaqarluartunit imaarneqartarput. Ilaannili inuit ulikkaartoorsimariarlutik puussiaq namminneerlutik silatiminnut iliinnartarpaat, anartarfilerisunillu aaneqarnissaa utaqqineqalersarluni. Taamaasiortariaqaraangalli aniasoortitsinissaq qaninnerulersaraluarpoq, taamaakkaluartorli puussianut ilisivinnik isumannaatsunik inuit namminneerlutik sanagunik ajornartorsiut qaangerneqariaannaavoq, Lone Kristensen, oqaluttuarpoq.
Ph.d.-nngorniutigineqartorlumi sapaatip akunnerani kingullermi illersorneqartumi maani anartarfiit imaartakkat anartarfinnik annat issumut akulerunnerisigut issunngortitsisartunik taarsersoqorneqalernissaat kaammattuutigineqarpoq, taamaasiorniaraannimi anartarfiit imaanik attuisoortarnissaq pinngitsoorneqarsinnaanerulissammat. Kaammattuutigineqartorlumi Qeqqata Kommunianit tapersersornartinneqarpoq:
- Anartarfinnik annat issumut akulerunnerisigut issunngortitsisartunik imaartakkat taarsersorneqarnissaat imminut akilersinnaanersoq paasisuugutsigu atulerneqarnissaat eqqarsaataasinnaalluarpoq, anartarfiilli issortallit annanillu issunngortitsisartut misileraarutigissallugit annertunerusumik periarfissaqanngilagut, taakkunanngali atuisunngornissatsinnut tunngavissaqarlualersuugutta isumassarsiaq eqqartorneqaqqissinnaavoq, Lone Kristensen taama naggasiivoq.
Annanik issumut akulerutsitsisarnermik misileraasoqallattaartoqalerpoq, ukioq mannami ukiorisseruttornerani, anartarfiit taamaattorpiaat marluk Sisimiut timaanni misiligutaasumik pilersinneqarput.