Kommunalbestyrelsimut ilaasortaq: Partiimit partiimut nuuttarneq oqallisigineqartariaqarpoq
- Partiimit partiimut nuuttarneq qinikkatut tamatta pinngitsoortinniartariaqaleripput isumaqarpunga, tassa ukioq manna Inatsisartunut kommunalbestyrelsinullu qinersinerup naammassinerani qinigaaffimmi matumani ukiunilu tulliuttuni nooqattaartarnersuaq pinngitsoortinniartariaqarparput, Tønnes Kreutzmann Kangaamiuneersoq, oqarpoq.
Partiimit allamut nuuttarneq qinersisartunut salloqittaanerusoq, taanna isumaqarpoq:
- Ukiuni kingullerni takornartaajunnaarpoq partii tunuliaqutaralugu qinigaareernerup kingorna partiimut allamut nuuttoqartarnera. Tamanna immini ajornartorsiutaanngilaq, kisianni isumaqarpunga qinersisartut salloqittarneqartutut inissisimalertartut, taamaattumik tamatuma nalinginnaasuunnginnissaa anguniarlugu inuiaqatigiinni oqallittoqartariaqarpoq, Tønnes Kreutzmann oqarpoq.
Taanna Kangaammiuni nunaqarfimmik aqutsisunut 1997-imili ilaasortaavoq, taamanikkullu Maniitsup Kommuniusimasup kommunalbestyrelsiani 2005-imit 2008-p tungaanut ilaasortaasimalluni.