Kommunalbestyrelsimi ilaasortat ataatsimiigiaqqusipput.
Innuttaasunik ataatsimiititsinissat pingasuusut tamanit maluginiarneqaqqullugit, kommunalbestyrelsimut ilaasortat Nuussuarmi Pisiffiup silataani saneqquttunut paasissutissanik agguaapput.
- Innuttaasunik ataatsimiititsinissat sapinngisarput tamakkerlugu innuttaasunut paasitikkusuppavut. Taamaattumillu innuttaasut tikillugit peqataanissaannik kajumissaarusuppavut, sumiiffinni ataatsimiititat aaqqissuunneqarnerat aamma sunik suliaqarnissaat pillugit sunniuteqaqataaniassammata. Suliassaq aallartitarput soqutiginartuuvoq, innuttaasullu oqaloqatiginissaannut qilanaarpugut, Mille Søvndahl Pedersen, Sanarfinermut Avatangiisinullu ataatsimiititap siulittaasua qilaanaarpalulluni taama oqarpoq.
Paasissutissanik ataasinngorpat agguaasoqaqqissaaq. Tamatumuuna nalunaaqutaq sisamat arferngullu (16-18) akornanni najukkani ataatsimiititat pillugit paasissutissanik politikerit Nuuk Centerimi agguaasseqqissapput.
Najukkani ataatsimiititat pillugit innuttaasunik ataatsimiititsinerit pingasut ukunani pissapput:
Marlunngorpat januaarip 21-anni nalunaaqutaq arfineq marlunit qulingiluanut, Atuarfik Hans Lyngep eqaarsaartarfiani.
Pingasunngorpat januaarip 22-anni nalunaaqutaq arfineq marlunit qulingiluanut, Nuussuup Atuarfiata inersuaani
Sisamanngorpat januaarip 23-anni nalunaaqutaq arfineq marlunit qulingiluanut, Ukaliusap kantiinaani.