Canadami arnat tammartut Misissuinissamut isumalioqatigiissitap sulinini aallartippaa

Canadami KNR-ip ilanngutassiortua Marianne Steenbæk taama nalunaaruteqarpoq.

Nunap inoqqaavisa arnartai toqutaasimasut tammarsimasullu pillugit nuna tamakkerlugu misissuinissaq qaammatit qulit matuma siorna aallartinneqarmat aallartisarniarnera arriinnerarlugu assut isornartorsiorneqartarsimavoq.

Misissuinissaq pillugu isumalioqatigiissitaq maanna siullermeerluni ataatsimiissimavoq tassuunalu suliap aallartinneqarnera malunnartillugu.

Nunap immikkoortuani Yokonimiittumi illoqarfimmi Whitehorsemi marlunngornermi misissuinissaq ingerlalluaqqullugu qinoqatigiinnermik aallartinneqarpoq ikumasussanillu pingasunik ataatsikkut ikitsisoqarluni Inunnut, indianernut métisinullu tunngatinneqartunik.

Naggueqatigut sinnerlugit Inuit siuttuat Mary Simon ikumatitassamik ikitseqataavoq. Whitehorsep aqquserngisigut nunap inoqqaavi qilaasersorlutik aappalaartulisaarlutillu suliamut tapersersuinertik takutinniarlugu ingerlaaqatigiipput.

Ataatsimiinnermi ullunik pingasunik sivisussusilimmi isumalioqatigiissitap ilaqutariit 40-it nalunaajaatissimai. Taakku tamat tusaatillugit pisimasut oqaluttuarisinnaavaat, kisimiillutik saqqummiillutik imaluunniit allakkatigut oqaaseqarlutik.
Tamakku oqaluttuaraat arnat inuusuttunnguit arnallu inersimasut pinngitsaalisaasimasut, toqutaasimasut imalunniit tammarsimasut, peerunnerilu ilaqutariinnut qanoq kinguneqarsimanersut.

Arnat tammarsiamsut qassuineri nikerarput, eqqoriarneqartarporli ukiut 30-it kingulliit ingerlanerini 10.000-it angullugit tammarsimasut toqutaasimallutilluunniit. Suliani tamakkunani 1000-it paasineqanngisaannarsimapput.

Eqqilik eqqartuussisoq Marion Buller isumalioqatigiissitami siulittaasuusoq oqarpoq pingaaruteqartoq Canadami tamarmi nunap inoqqaavisa arnartaasa nakuusersorfigineqartarnerisa tusartinnissaat.

Ilisimannittutut nassuiaasut siulliit assut killitsisimaarsimapput oqarlutik oqaasissaminnik annitsisinnaanngitsunut sinniisuullutik.

Isumalioqatigiissitaq ukiuni marlunni tulliuttuni Canada tamakkerlugu angalaffigissavaat ilaqutariit eqqugaasimasut tusarniaavigissallugit.