Teknikkikkut ajutoorneq: Evap meeqqat kaattut ikiortariaqarai
Eva Davidsen ikinngutinilu Nuummi ataasinngormat unnukkut cafémi nereqatigiillutik nuannisarniaraluarput.
- Taamannak naammattuuissangannginnermut paatsiveerutiusallunga qeriinnaraluarpunga, qanoq-iliussanerlunga…, Eva Davidsen taamaoqaluttuarpoq
Nerileruttorlutimmi meeqqat pingasut, arfinillit arfineq-pingasullu akornanni ukiullit, igalaakkut kasuttorput.
Allanit qisuariarfigineqanngimmata Eva Davidsen issivimminit nikuippoq.
- Alakkarakkit aperiartorlugit sunersut, sorusunnersut. Taava tassani nukappiaraq nassuiaalerpoq qiullutik taavalu perlerlutik, Eva Davidsen oqarpoq.
Meeqqat oqaluttuarput angajoqqaatik angerlarsimaffimmi aalakoortut, aammalu imminni nerisassaateqaratik.
Evap sandwichinik pisigaluarpai, meeqqalli ittoorlutik cafémut iserumanngillat. Nerisassanilli takullutik qisuariaataat Eva Davidsenip paatsuugassaannginnerarpaa.
-Taava puussiartaanit ingerlaannaq peeriarlugit, nukappiaqqat uani toqqoqqasut nukarliit, suli mikinerit, qaaqqoriarlugit agguaatipallakkamikkit, poortorneri ingerlaannaq peeriarlugit nerileramikkit, Eva Davidsen taama oqaluttuarpoq.
Oqartussat ikiuutinngitsut
Meeqqat qimagutipallapput, Eva Davidsenillu kingorna isumaginnittoqarfimmi pigaartut sianerfigigaluarpai oqarasuaalli tiguneqanngilaq. Aamma politiinut sianerpoq, taakkulu nassuiaapput suliani taama ittuni iliuuseqarnissaminnut pisinnaatitaanatik.
Politiiniillu KNR-imut ilisimatitsissutigineqarpoq meeqqat sumi najugaqarnerat kingorna paasineqartoq isumaginnittoqarfillu suliaq pillugu nalunaarfigineqartoq.
Teknikkikkut qamittoorneqarsimanera pissutaasoq
Isumaginnittoqarfimmi pigaartumut kommunip nalinginnaasumik ammasarfiisa avataasigut, piffissaq qanoq-ikkaluarpalluunniit sianertoqarsinnaanera Kommuneqarfik Sermersuumi Meeqqanut Ilaqutariinnullu pisortap, Martha Lund Olsenip, uppernarsarpaa.
- Ajuusaarnartorujussuarmik pisoqarsimavoq. Sulisutta ilaata teknikkikkut taanna qamittoorsimavaa. Attaveeruttoorneqarsimavoq. Soorunami taamaattoqartussaanngilaq, aamma ammasussaavoq soorunami. Qulakkiigassaavoq aamma ammanersoq. Martha Lund Olsen oqarpoq.
Kukkunernik assingusunik siunissami pisoqaqqunagu qanoq iliortoqaarsinnaanersoq kommunimit maanna misissorneqarpoq.
Eva Davidsenip pisoq pillugu Facebookikkut allaaserisaa maannamut 1800-nit amerlanerusunit qisuariarfigineqarpoq, 146-nit oqaaseqaateqarfigineqarluni 700-llu sinnerlugit ingerlateqqinneqarluni.