Knud Rasmussenip atuakkiaa franskisut danskisullu saqqummerseqqinneqartoq

Knud Rasmussenip oqaluttuatoqqanik katersai 'Knud Rasmussen - Grønlandske sagn i udvalg' meeqqanut atuagassianngorlugu Saqqummersitsisarfimmit Gyldendalimit 1935-mi saqqummersinneqarpoq. Atuakkamik saqqummersitsisuuvoq atuartitsisoq danskeq, Gerda Steemann, Kalaallit Nunaannik soqutigisalik issittumilu paasisassarsiortunik arlalinnik ilisarisimasaqartoq.

Atuagaq assiliartalersugaanani taamani saqqummersinneqarpoq, titartakkalli saqqummersitamut siullermut atugassaasimagunartut ukiuni qulikkuutaani arlalinni Steemannip ilaqutaanit pigineqarsimapput. Titartakkat allattaaviillu skrivemaskiinamik allatat 100-nik quppernillit Gitte Løberip ataataminit, Gerda Steemannip uianit, pissarsiarisimavai. Allattaaviit imaraat atuakkamut 1935-meersumut allaqqaakkat.

Gitte Løberip, Frankrigimi najugaqartup, allaqqaagaq franskisuunngorlugu nutserpaa saqqummerseqqillugulu - tamatumuuna assiliartalersorlugu. Atuagaq Frankrigimi apriilip qaammataani saqqummerpoq.

Gitte Løberip atuakkap saqqummersinnissaanut piareersaateqarnermini titartaasoq aamma nassaariniarsarisimavaa. Titartakkammi tamaasa atsiorneqarsimapput 'Lotte'-mit, taannalu Gerda Steemannip Kalaallit Nunaanniitilluni naapissimavaa. Tamatuma saniatigut ilaqutariit 'Lotte'-mut tunngasunik allanik ilisimasaqanngillat.

Taamaammat Nunatsinni titartakkanik ilisarisaqartunik maanna ujarlerpoq. Titartakkat europamiorpalaartunik assiliartaqarput - soorlu siniffik, nerrivik issiaviillu.

Titartakkat pillugit ilisimasaqaruit KNR-imut webredaktion@knr.gl-imut allassinnaavutit. Taava Gitte Løberip attaviginissaa isumagissavarput.