Knud Rasmussenip assilisai ilisimatuunit atorluarneqartussanngorput
1930-ikkuni ilisimasassarsiornernit assilisat negativii igalaaminernik sinilerneqarsimasut maanna nassaarineqarmata Nunatsinni sermersuit imaannaanngitsut qimerloornissaannut ilisimatuut nutaavimmik periarfissarsipput.
Aviisimi Politikenimi ullumi saqqummersumi tamanna allaaserineqarpoq.
Igalaamerngit pineqartut Nunat immallu assinginik aqutsisoqarfimmi siumorneqarput, ilisimasassarsiornerit arfineq-aappaanni, Knud Rasmussenip naammassisaaneersuullutik. Tunumi sermit iigarlutik imaanut pisarnerat, Knud Rasmussenip ilaatigut assilisarsimavai.
Silaannarmit assilisat Tunumeersut negativini katersani nassaarineqartuni aamma ilaapput.
Knud Rasmussenip ilisimasassarsiornerini assilisat nassaarineqartut pissutigalugit silap ukiut 80-it matuma siorna kissatsikkiartorsimanerata sunniutai ilisimatuut maanna misissorsinnaanngorpaat.
- Silaannaap siusinnerusukkut kissatsittarnera nillertittarneralu serminut qanoq sunniuteqartarsimanersoq maanna misissorsinnaanngorparput, Naalagaaffiup Pinngortitaleriffiata katersugaasiviani ph.d-nngorniutigalugu allaaserisaqartoq, Anders Anker Bjørk oqarpoq.
Sermit sumiiffiit ilaanni ullumikkornit sukkanerusumik aattarsimasut, assitoqanngulersuni takuneqarsinnaavoq. Sermit iigartartut ullumikkutorpiaq sukkatigisumik nungukkiartortarsimapput.
- Immap kissassusaanut malussarissorujussuupput, qallunaaq ilisimatooq taanna nassuiaavoq. Ukiut hunnorujulikkuutaat siuliata qiteqqunneranni tamaani kissatsikkiartorsimavoq.
-Tamatumunnga suna pissutaanersoq iluamik suli paasineqanngilaq, eqqoriarneqarporli silaannarmi sananeqaatinik pujoralaasarpassuaqarsimassasoq, immaqaluunniit Atlantikup avannaani immat sarfarnerat nikerartorujussuusimassasoq, Anders Anker Bjørk nassuiaavoq.