KNR-TV piviusunik tunngavilinnik aallakaatitassiissaaq
Aallakaatitassiat taaguuteqarput "Qaannat alannguanni", Kalaallit Nunaata 1939-miit Namminersornerulernerup 1979-imi eqqunneqarnera tikillugu politikkikkut ineriartornera sammineqassalluni.
1940-kkunni pisimasut aallakaatitassiami siullermi sammineqassapput, Kalaallit Nunaata avammut ammaanneqarnissaanik ineriartortinneqarnissaanillu kissaatit matumani sammineqassallutik.
Piviusut tunngavigalugit aallakaatitassiorneq aatsaat taama annertutigisoq suliarineqarpoq.
Tusagassiortup atuakkiortullu Tupaarnaq Rosing Olsenip KNR suleqatigalugu "Qaannat alannguanni" aallakaatitassiaraa, atuakkiaata aqqa matumani qulequtarineqarluni.
Atuakkiaq kalaallisut 2002-mi saqqummersinneqarpoq, qallunaatuunngortillugulu 2005-imi saqqummersinneqarluni.
Piviusut tunngavigalugit aallakaatitassiaq kalaallisut qallunaatullu aallakaatitassiaavoq.
Nunasiaasimanerminngaanniit Namminersornerulernerup eqqunneqarnissaanut politikkikkut ineriartornermi peqataasut aallakaatitassani oqaluttuartinneqarput.
Tupaarnaq Rosing Olsen aallakaatitassialiornerminut atatillugu paasiniaanermini Dansk Filminstitutimiittarpoq, filmitoqqat suli saqqummersinneqarsimanngitsut siumorsimallugit.
Statsministerip Hans Hedtoftip Kalaallit Nunaannut 1948-mi tikeraarnera takuneqarsinnaavoq, Kalaallit Nunaat avammut ammaanneqassanersoq ineriartortinneqassanersorlu Landsrådit taamanikkut ataatsimeeqatigiartoramigit.
Nunatta namminersulernissaata tungaanut politikkikkut allatigullu ineriartornera pissanganartoq takorusukkukku KNR-TV unnugu nalunaaqutaq arfineq-pingasunut isiginnaaginnariuk, ataasinngornerillu tulliuttut sisamat aamma taamaalioriannguarisi
