KNR TV-mi aamma Radiomi pisortat nutaat
Pisortanngortussat KNR-imi sulilertussanngornerat KNR-imi pisortanit nuannaarutaallunilu isumalluarfiuvoq.
- Pissutsit nutaat nalimmassarfiginiarlugit Kalaallit Nunaata Radioani allanngortiterinermi pilersaarusiorluarneq aallaavigalugu aallakaatitassioriaatsit nutarsaaviginiarneqarput, taamaattumik pisortanngortussat KNR-imi suleqataasussanngornerat isumalluarnermik pilersitsivoq, pisortanngortussat peqatigalugit nutarsaanerup aallunneqalernissaa qilanaarnarluinnarpoq, taama oqarpoq KNR-imi aallakaatitassiornermi pisortaq, Frederik Lund.
Radiomi TV-milu maanna pisortaasut, Knud Aalua Lynge aamma Niels Pavia Lynge, aallakaatitassiornermut pilersaarusiorneq sukumiinerusumik aallutarilissallugit KNR-ip piorsaaviani sulilissapput.
- Taakku marluullutik piginnaasaat – ilisimasaallu - KNR-imi pinngitsoorneqarsinnaanngillat, taamaattumik suliarisarisartareriikkamik ilaannik sukumiinerusumik aallussilernissaminnut periarfissaqalersussanngornerat immini aamma isumalluartuuvoq. Soorlu pisortanngortut pillugit oqaaseqarninni ersersikkiga – aallakaatitassioriaatsit nutarteriffigineqassappata aamma pilersaarusiornerit suleqatissarsiornerillu sukumiinnerusumik aallunneqarnissaat pinngitsoorneqarsinnaanngitsut ilagaat, taammaattumik pilersaarusiornermik piginnaasaqarluartut suliassanik taakkuninnga aallussinerulernissaat immini aamma isumalluartuuvoq, Frederik Lund oqarpoq.
KNR Radiomi pisortanngortussaq Thora H. Nielsen aggustip aallaqqaataa aallarnerfigalugu KNR-imi sulilissaaq, taavalu Malînánguaq Marcussen Mølgaard, TV-mi pisortanngortussaq oktobarip aallaqqaataani sulilissalluni.
