KNR KNR tusagassiuutitigut isumaqatigiissuteqarpoq
Nunani Avannarlerni Nunanilu Avannarlerni Killerni suleqatigiinnut KNR ilaalerpoq, soorlu aamma Danmarks Radio taamaattoq. Suleqatigiilernerup kingunerisaanik nunani eqqartorneqartuni tv-kkut radiokkullu aallakaatitat nammineq suliarisat KNR-rikkut aallakaatinneqarsinnaanngussapput. Norgemi radiokkut tv-kkullu aallakaatitassiortarfiup NRK-ip toqqorsiviani Nunani Avannarlerni Nunanilu Avannarlerni Killerni aallakaatitassiarineqarsimasut toqqorneqartarput.
”Nunani Avannarlerni aammalu Nunani Avannarlerni Killerni uagut suliatta assinginik suliaqartuusut pitsaalluinnartunik aallakaatitassiortarput. Tamakkua uagut massakkut iluaqutigisinnaanngorpagut aammalumi aallakaatitat ilaat uagutsinnut Kalaallit Nunaanni najugaqartuusunut soqutiginaateqartarput”, taama oqarpoq KNR-ip pisortaa Søren Lennert Mortensen imatullu nangilluni: ”Piviusuinnik aammalu pinngortitamut tunngasut aallakaatitsinerit uagutsinnut soqutiginaateqartut amerlapput, aammattaarlu assersuutigalugu taasinnaavakka inooriaatsimut aallakaatitanut tunngasut takujumaneqartaqisut nuannarineqartartullu.
Nordvisionimi nunat makkua aallakaatitassiortarfii peqataapput: Danmarks Radio, Finlandimi, Sverigemi, Norgemi Islandimilu aallakaatitsisarfiit pisortanit pigineqartut. Danmarks Radiop ilaasortaaneranut tunuliaquteqarlutik Savalimmiuni Kalaallit Nunaannilu aallakaatitaasiortarfiit pisortanit pigineqartut NORDVISION ilaapput.
”Suleqatigiilernerup kingunerissavaa aallakaatitassiat siornatigut aallakaatinneqarsimanngitsut amerlinerat, tassa aallakaatitseqqittarnerit ikilissapput”, Søren Lennert Mortensen oqarpoq.
Ilaasortaanermut akiliutit ukimoortumillu ingerlatitsinermut aningaasartuutissat annertoorsuunngillat, immaqami oqarsinnaassaagut taamatut aallakaatinneqartartussat akeqassannngitsut kisiannili matumani kalaallisut oqasertalersorneri akeqassapput, soorngunami.
Misiligutaasumik siullermik kalaallisut aallagartalersornagit tamakkuninnga aallakaatitsisassaagut kiisalu aallakaatitap oqaatsit atugai allanngortinnagit. Kisiannili pilersaarutigaarput aallakaatitat piukkunnarsorisagut toqqartarniarlugit. Taakkua kalaallisut allagartalersortarniarpagut. Tamatumani siunertamut aningaasaliusassat apeqqutaassapput, tassa aningaasaqarneq aallaavigalugu kalaallisut allagartalersuisassaagut. Massakkorpiaq taamatut kalaallisut allagartalersuisinnaasumik ujarlerpugut.
Savalimmiuni radiokkut tv-kkullu aallakaatitsifiusartup Kringvarpip ukiumoortumik aalllakaatitat 300-it Nordvisionikkut pissarsiani aallakaatittarpai.
”Upernaaq manna aallakaatitaasalersussat Nordvisionimeersut aallartissamaarpagut”, Søren Lennert Mortensen taama neriorsuivoq imatullu naggataatigut oqarpoq:” Taamaasilluta Nunat Avannarliit Nunallu Avannarliit Killiit akornanni kulturikkut oqaatitsigullu attaveqarnerup nukittorsarneqarnissaa periarfissinneqarpoq.”
