KNR KNR radiomik tusarnaartarfik nutaamik inuusuttunut kanalimik nipilersuuterpassuartalimmik ullumikkut ilanngussivoq

Piffissami sivisuumi KNR-ip radiokanalimik allaanerusumik nalaartarfeqalernissaa sulissutigisimavaa, maannakkut atuuttuusumut ilisimaneqarluartumullu kanalimut ilapertuutaasussamik. Amerlasoorpassuit KNR radio, KNR-ip naalaarniartarfeqarnerani siuttuusoq, nuannarilluinnartuuaat. Naalaartartunik isiginnaartartunillu misissuisitsinerup kingulliup takutippaa, radiomik atuisut amerliartuinnartuusut, naalaartartullu 77 %-inik ikinnerunngitsut radiomi aallakaatinneqartartunik iluarisimaarinnittuusut. 

• KNR-imi inuusuttunik naalaartartunik, uanga misigisakka naapertorlugit piffissami sivisuumi ilaginnarsimasatsinnik, qanimut attaveqarnerorusuppugut, tassalu radiokanalimik nutaamik tamanna angorusupparput, ullutsinni nipilersukkanik aallakaatitassianillu aliikkusersuinertalinnik aallakaatitsiffiusartussaq, inuusuttuunerusunut sammisunik, taamatut oqarpoq KNR-ip pisortaa Søren Lennert Mortensen nangillunilu:
• Isumaqarpunga ullumikkut uagut radiokkut aallakaatitassiortartugut amerlasuunik pitsaalluinnartuusunik inersimasunut naalaartartunut sammisunik, uagullu tusagassiortunit suliarineqartartunik aallakaatitassianik amerlanerusunik aallakaatitsisalerusuppugut, tassungalu ilanngullugit nutaarsiassanik ullutsinnilu pisut aallaavigalugit aallakaatitassianik aallakaatitassiortarnissaq. Tamatumuuna maanna periarfissaqalerpugut, tassami aallakaatitassiat aalajangersimasut nipilersukkanillu aliikkutassiat kanalimut nutaamut nuunneqassammata.  

Siullermik kanali web-itut radiokanaliussaaq, FM kanalimik Nuummi ilaqartinneqartumik, kisianni FM-ikkut aallakaatitsisarneq sinerissap sinneranut siaruarternissaa sulissutigaarput. Aammattaaq sulissutigaarput inuusuttunut kanali nutaaq DVBT båndimut ilanngunnissaa (TV akeqanngitsunut radiokanalinullu allanut ilanngullugu), taamaaliornikkut Kalaallit Nunaanni tamarmi kanali naalaarneqarsinnaasunngorlugu.

• Nuannaarutigeqaarput kanali nutaaq, minnerunngitsumillu nuannaarutigaarput maannakkut uagut aallakaatitassiat assigiinngitsunut sammitilersinnaanerusunngoratsigit, tassami utoqqaanerusunik aliikkusersuineq aamma inuusuttut naalaarusutaat soorunami assigiinngissuteqarmata, kisianni radiokkut kanalinut taakkununnga marlunnut assigiissutaasoq tassa nalunaaquttap akunnikkaartumik nutaarsiassat taakkunani marlunni naalaarneqarsinnaassammata. Uagut angorusutarput tassaavoq inuusuttut periarfissinneqarnissaat annertunerusumik nutaarsiassanik naalaartarsinnaanissaminnut, Søren Lennert Mortensen ilisimatitsivoq.

Radiokkut kanali nutaaq maannakkut atorneqarsinnaalereerpoq uani www.vog.gl

• KNR-ip iluani tamanna radiokkut aallakaatitassioriaatsinik nutaanik pissanganartunik tulluartunillu ineriartortitsinissamut killiliussanik pitsaanerulersitsinermik kinguneqassaaq. Aallakaatitassiat nutaat ilagaat tusarnaagassianik nutaanik arlaqartunik aallakaatitassiornissaq, ilisimavaralu tamakku Nunatsinni amerlasuunik ujartorneqartartorujussuusut, pisortaq isumaqarpoq. 

KNR radio tassaavoq taamaattuassallunilu uagut kulturimik kanalerput nr. 1, uagullu tamanna tulluusimaarutigaarput, ukiorlu 2015 uagut ilutsinni toqqarparput radiop ukiorissagaa, matumuunalu naalaartartutsinnit kissaatit siunnersuutillu perusuppavut, taamaalilluta ataatsimoorluta radio ineriartortissinnaajumaaratsigu, Søren Lennert Mortensen naggasiivoq.

Siunnersuutit, kissaatit aamma oqaaseqaatit KNR-imut nittartakkatigut nassiuteriannguakkit ugguuna www.knr.gl

Radiomi iliuuserineqartumut nutaamut atatillugu ilutsinni allannguivugut imaalilluta; Henriette Rasmussenip siunissami kulturimik aaqqissuisutut atorfik nutaaq atorfigilissavaa, tassani ilaatigut KNR-ip kulturimut aningaasartuutai akisussaaffigilissallugit tamatumuunalu ilutigalugu kulturimik tv-kkut radiokkullu aallakaatitassiortarneq. Radiomi pisortatut atorfik Masaana Egedemit atorfigineqalerpoq, taanna KNR-imi attaveqaqatigiinnermut pisortatut atorfimmeersuuvoq.