KNR-radio 60-inngortorsiorpoq
KNR-Radiup pisortatigoortumik illorsuaani siullermi tusarnaagassiat ukiut 60-it matuma siorna immiunneqarsimapput.
Juulillu 21-at KNR-Radiup ukiunik 60-inngortorsiorfigaa. Niels-Pavia Lynge 1976-mi teknikeritut ilinniartuutilluni KNR-imi sulilerpoq. Radiukkullu aallakaatitassiortarsimasorpassuit suleqatigisarsimavai.
- Mattulluta ajoqusersorneqarata ullut naasarlugit reportageliortarpugut immaqaluunniit hørespilliliortarluta. Puigunaatsorujussuupput inuit peqqissaarlutik suliartik kisiat eqqarsaatigalugu tusarnaagassiortut suleqatigalugit, Niels-Pavia Lynge oqarpoq.
Massakkut teknikkikkut atortorissaarutit muteernioqisut 70-ikkut naajartulerneranni sinnattuinnaasimapput. Teknikkerimmi taamani namminneq tamarmik qiuuteqartariaqartarsimapput.
- Arlaannik oqqarluttoqarsimappat qiuutit taakku atorlugit båndi qiorlugu taavalu nipitillugu, taavalu kukkunertaa eqqaavimmut igillugu. Taamaasilluni tassa atuffassisoq kukkuneqanngitsumik atuarsinnaasarpoq.
Niels-Paviap KNR-imi sulinermini suleqatigisarsimasarpassuisa ilagaat radiukkut aallakaatitassiortarsimasut ilaat Peter Hammeken.
Taanna 70-ikkut naajartulerneranni Upernavimmut immiussiartortoq Niels-Paviap angalaqatigisimavaa. Upernaviullu innuttai tamarluinnangajammik tikilluaqqusiartorsimapput.
- Radiomi tusaamasartik immiussiartorluni tikittoq inuttaa kutaariartorlugu ilassiartorlugu takkussuuttut. Misigisaq taanna alutornarlunilu eqqumiilaarpoq, kisianni aamma nuannerluni.
KNR-Radiup ukiuni 60-inngortorsiorneranut atatillugu radiukkut aallakatitassiat marluk sapaatip-akunnerata naanerani tusarnaarneqarsinnaassapput, aamma nalliuttorsiorneq malunnartinniarlugu Katuamiit oktobarip 27-ni aallakaatitsisoqassaaq.